സാറെ തെരുവ് നായ്ക്കൾ ഞങ്ങളെ ആക്രമിക്കുന്നു. സഹായിക്കണം’പരാതിയുമായി വിദ്യാര്‍ത്ഥികള്‍ ചങ്ങരംകുളം പോലീസ് സ്റ്റേഷനിൽ

ചങ്ങരംകുളം :തെരുവുനായ്ക്കളുടെ ശല്യം രൂക്ഷമായതിനെ തുടർന്ന് കളിക്കാനും പഠിക്കാനും പോകാൻ സാധിക്കുന്നില്ലെന്ന പരാതിയുമായി ഒരു കൂട്ടം വിദ്യാര്‍ത്ഥികള്‍ ചങ്ങരംകുളം പോലീസ് സ്റ്റേഷനിലെത്തി.ഞായറാഴ്ച കാലത്ത് 11 മണിയോടെയാണ് ചങ്ങരംകുളം സ്റ്റേഷന്‍ കൗതുകം നിറഞ്ഞ പരാതിക്ക് സാക്ഷ്യം വഹിച്ചത്. ആലംകോട് അവറാന്‍പടിയിലെ എട്ടോളം വരുന്ന വിദ്യാര്‍ത്ഥികളാണ് സഹായഭ്യർത്ഥനയുമായി ചങ്ങരംകുളം പോലീസ് സ്റ്റേഷനിൽ എത്തിയത്.സഹപാഠികളായ 20 പേരുടെ ഒപ്പ് ശേഖരിച്ചുകൊണ്ട് എഴുതി തയ്യാറാക്കിയ പരാതി ചങ്ങരംകുളം സിഐ ഷൈനിന് ഇവര്‍ സമര്‍പ്പിക്കുകയും ചെയ്തു.സ്കൂളിലേക്കും കളിക്കാനും പുറത്ത് പോകുമ്പോള്‍ തെരുവ് നായ്ക്കൾ ഞങ്ങളെ വളഞ്ഞിട്ട് ആക്രമിക്കാൻ ശ്രമിക്കുകയാണെന്നും ഭയം മൂലം പുറത്തിറങ്ങാൻ സാധിക്കുന്നില്ലെന്നും ഞങ്ങളെ സഹായിക്കണമെന്നും ആവശ്യപ്പെട്ടുകൊണ്ടാണ് കുട്ടികൾ ചങ്ങരംകുളം പോലീസ് സ്റ്റേഷനിൽ എത്തിയത്. കുട്ടികളുടെ പരാതി അനുഭാവപൂർവ്വം കേട്ട സി ഐ ഷൈൻ ആവശ്യമായ ഇടപെടൽ നടത്താമെന്ന് പറഞ്ഞ് കൈപ്പറ്റ് റെസിപ്റ്റ് നൽകി കുട്ടികളെ ആശ്വസിപ്പിച്ചാണ് പറഞ്ഞുവിട്ടത്.വിദ്യാർത്ഥികളായ,ഷയാൻ,സുൽത്താൻ,മുഹമ്മദ് അദ്നാൻ,ഷഹാൻ,ദിൽരൂപ്, ഷാമിൽ, സിനാൻ,
ഫവാസ് എന്നിവർ സംഘത്തിൽ ഉണ്ടായിരുന്നു.