പത്തനംതിട്ട: അഹമ്മദാബാദ് വിമാനദുരന്തത്തിൽ മരിച്ചവരിൽ മലയാളി നഴ്സും. പത്തനംതിട്ട പുല്ലാട് സ്വദേശിനിയായ രഞ്ജിത ഗോപകുമാരൻ നായർ(40) ആണ് മരിച്ചത്. ലണ്ടനിൽ നഴ്സായിരുന്ന രഞ്ജിത നാട്ടിൽവന്ന് തിരികെ മടങ്ങുന്നതിനിടെയാണ് ആകാശദുരന്തത്തിൽ ജീവൻ പൊലിഞ്ഞത്. രണ്ട് മക്കൾക്കൊപ്പം പുതിയ വീട്ടിൽ താമസിക്കുകയെന്ന സ്വപ്നം ബാക്കിവെച്ചാണ് രഞ്ജിതയുടെ മടക്കയാത്ര.
2014-ൽ ഒമാനിലാണ് രഞ്ജിത ആദ്യമായി നഴ്സായി ജോലിയിൽ പ്രവേശിക്കുന്നത്. ഇതിനിടെ 2019-ൽ പി.എസ്.സി. എഴുതി സർക്കാർ സർവീസിൽ ജോലി ലഭിച്ചു. കോഴഞ്ചേരി ജില്ലാ ആശുപത്രിയിലാണ് രഞ്ജിത ജോലിചെയ്തിരുന്നത്. പിന്നീട് ഇവിടെനിന്ന് അവധിയെടുത്ത് വീണ്ടും ഒമാനിലേക്ക് പോയി. ഒമാനിലെ സലാലയിൽആരോഗ്യ മന്ത്രാലയത്തിൽ സ്റ്റാഫ് നഴ്സായിരുന്നു. സലാല സുൽത്താൻ ഖാബൂസ് ആശുപത്രിയിലായിരുന്നു ജോലി. സലാലയിൽ നഴ്സായി ജോലിചെയ്യുന്നതിനിടെയാണ് പരീക്ഷയെഴുതി ലണ്ടനിലേക്ക് പോയത്. ഏകദേശം ഒരുവർഷം മുമ്പാണ് രഞ്ജിത ലണ്ടനിൽ എൻഎച്ച്എസിൽ ജോലിയിൽപ്രവേശിച്ചത്. എന്നാൽ, അധികം വൈകാതെ ഓഗസ്റ്റിൽ തിരികെ നാട്ടിലെത്തി സർക്കാർ സർവീസിൽ തിരികെ പ്രവേശിക്കണമെന്നായിരുന്നു ആഗ്രഹം.
കോഴഞ്ചേരി ജില്ലാ ആശുപത്രിയിലെ ജോലിയിൽ തിരികെ പ്രവേശിച്ച് നാട്ടിൽ നിർമിക്കുന്ന പുതിയ വീട്ടിൽ ഇനിയുള്ള കാലം താമസിക്കാനായിരുന്നു തീരുമാനം. ജില്ലാ ആശുപത്രിയിലെ ജോലിയിൽ തിരികെ പ്രവേശിക്കേണ്ടതിന് ആവശ്യമായ നടപടിക്രമങ്ങൾക്കായാണ് ഇത്തവണ രഞ്ജിത നാട്ടിലെത്തിയത്. ഇതെല്ലാം പൂർത്തിയാക്കി ലണ്ടനിലേക്ക് മടങ്ങുന്നതിനിടെയാണ് അഹമ്മദാബാദിലെ വിമാനദുരന്തത്തിൽ രഞ്ജിതയുടെ ജീവൻ പൊലിഞ്ഞത്
കഴിഞ്ഞദിവസം വൈകീട്ടാണ് രഞ്ജിത അവധി കഴിഞ്ഞ് വീട്ടിൽനിന്ന് മടങ്ങിയത്. ചെങ്ങന്നൂരിൽനിന്ന് ട്രെയിൻമാർഗം നെടുമ്പാശ്ശേരിയിലെത്തി അവിടെനിന്ന് ചെന്നൈയിലേക്കും പിന്നീട് അഹമ്മദാബാദിലേക്കും പോവുകയായിരുന്നു. അഹമ്മദാബാദിൽനിന്നായിരുന്നു ലണ്ടനിലേക്കുള്ള വിമാനം.
മാസങ്ങൾക്ക് മുമ്പാണ് നിലവിലെ വീടിനോട് ചേർന്ന് രഞ്ജിതയുടെ പുതിയ വീടിന്റെ നിർമാണം ആരംഭിച്ചത്. വീടിന്റെ നിർമാണം ആരംഭിക്കുന്നവേളയിൽ രഞ്ജിത നാട്ടിലെത്തിയിരുന്നു. പുതിയ വീടിന്റെ നിർമാണം 75 ശതമാനത്തോളം പൂർത്തിയായിരുന്നു.
പത്തനംതിട്ട പുല്ലാട് പരേതനായ കൊഞ്ഞൊൺ ഗോപകുമാരൻ നായരുടെയും തുളസിയുടെ മകളാണ് രഞ്ജിത. മക്കൾ: ഇന്ദുചൂഡൻ ((പത്താംക്ലാസ് വിദ്യാർഥി, എസ്വിഎച്ച്എസ്എസ് പുല്ലാട്), ഇതിഗ (ഏഴാം ക്ലാസ് വിദ്യാർഥിനി, ഒഇഎം സ്കൂൾ ഇരവിപേരൂർ) സഹോദരങ്ങൾ: രഞ്ജിത്ത്, രതീഷ്.
അഹമ്മദാബാദിൽനിന്ന് ലണ്ടനിലേക്ക് പുറപ്പെട്ട എയർഇന്ത്യയുടെ എഐ171 ബോയിങ് 787-8 ഡ്രീംലൈനർ വിമാനമാണ് അഹമ്മദാബാദ് വിമാനത്താവളത്തിന് സമീപം മേഘാനി നഗറിലെ ജനവാസമേഖലയിൽ തകർന്നുവീണത്
