കുന്ദമംഗലം (കോഴിക്കോട്): വില്‍പ്പനയ്ക്കായി കൊണ്ടുവന്ന 78.84 ഗ്രാം എംഡിഎംഎയുമായി കാരന്തൂരില്‍ രണ്ട് യുവാക്കള്‍ പിടിയില്‍. മലപ്പുറം വാഴയൂര്‍ സ്വദേശി മാടഞ്ചേരിയില്‍ മുഹമ്മദ് റാഫി (21), പൊക്കുന്ന് കിണാശ്ശേരി സ്വദേശി കോലഞ്ചിറയില്‍ മുഹമ്മദ് ഇബാന്‍ (22) എന്നിവരെയാണ് സിറ്റി നര്‍ക്കോട്ടിക് സെല്‍ അസി. കമ്മിഷണറുടെ അധികച്ചുമതലയുള്ള ബാലചന്ദ്രന്റെ നേതൃത്വത്തിലുള്ള ഡാന്‍സാഫും കോഴിക്കോട് മെഡിക്കല്‍ കോളേജ് അസി. കമ്മിഷണര്‍ ഉമേഷിന്റെ നേതൃത്വത്തിലുള്ള കുന്ദമംഗലം പോലീസുംചേര്‍ന്ന് പിടികൂടിയത്.ബെംഗളൂരുവില്‍നിന്ന് കാറില്‍വരുകയായിരുന്ന ഇവരെ ഓവുങ്ങരയില്‍ ഞായറാഴ്ച പുലര്‍ച്ചെ അഞ്ചിന് കുന്ദമംഗലം എസ്‌ഐ എ. നിധിന്‍ അറസ്റ്റുചെയ്തു. കാറിന് പിന്‍വശത്തെ സീറ്റില്‍ ഇടതുവശത്ത് ഘടിപ്പിച്ച മാഗ്‌നറ്റിക് ബോക്‌സില്‍ പ്ലാസ്റ്റിക് കവറില്‍ ഒളിപ്പിച്ചനിലയിലായിരുന്നു രാസലഹരി. ഒരു ഫോണും പിടികൂടി.
ബെംഗളൂരുവില്‍നിന്ന് രാസലഹരി മൊത്തമായി കൊണ്ടുവന്ന് ജില്ലയിലെ പലഭാഗങ്ങളിലേക്കും എത്തിച്ചുകൊടുക്കുകയും ചില്ലറവില്‍പ്പന നടത്തുകയും ചെയ്യുന്ന ലഹരിമാഫിയാസംഘത്തിലെ മുഖ്യകണ്ണികളാണ് ഇവരെന്ന് പോലീസ് പറഞ്ഞു.മെഡിക്കല്‍ കോളേജ്, കുന്ദമംഗലം, മാനാഞ്ചിറ, പാളയം എന്നിവിടങ്ങളിലെ സ്‌കൂള്‍, കോളേജ് വിദ്യാര്‍ഥികള്‍ക്കിടയിലും യുവജനങ്ങള്‍ക്കിടയിലും, മറുനാടന്‍തൊളിലാളികള്‍ക്കും മറ്റും വില്‍പ്പന നടത്തുകയും ഈ പണമുപയോഗിച്ച് ആര്‍ഭാടജീവിതം നയിച്ചുവരുകയുമായിരുന്നു പ്രതികളെന്ന് പോലീസ് പറഞ്ഞു.
മറ്റുസംസ്ഥാനങ്ങളില്‍നിന്ന് കോഴിക്കോട് ഭാഗത്തേക്ക് രാസലഹരി എത്തിക്കുന്നവരെപ്പറ്റി കൂടുതല്‍ വിവരങ്ങളും പോലീസിനുലഭിച്ചിട്ടുണ്ട്. ഡാന്‍സാഫ് എസ്‌ഐ മനോജ് എളയേടത്ത്, സുനോജ് കാരയില്‍, പി.കെ. സരുണ്‍കുമാര്‍, കുന്ദമംഗലം സ്റ്റേഷനിലെ എസ്‌ഐ ഹാഷിഷ്, എസിപിഒ വിജേഷ്, സിപിഒ ബിബിന്‍ പ്രകാശ് എന്നിവരാണ് അന്വേഷണസംഘത്തിലുണ്ടായിരുന്നത്. കോടതിയില്‍ ഹാജരാക്കിയ പ്രതികളെ റിമാന്‍ഡുചെയ്തു.
