നിരാലംബരെ ഏറ്റെടുത്ത് കേരളം; കഴിഞ്ഞ വർഷം ഏറ്റെടുത്തത് 800-ഓളം പേരെ, ഏറ്റവും കൂടുതൽപേർ തലസ്ഥാനത്ത്

കൊച്ചി: മെഡിക്കല്‍ കോളേജ് ആശുപത്രികളിലും ജില്ലാ ആശുപത്രികളിലും ചികിത്സ പൂര്‍ത്തിയായിട്ടും ഏറ്റെടുക്കാന്‍ ആരുമില്ലാതെ ഉപേക്ഷിക്കപ്പെടുന്ന നിരാലംബരെ ഏറ്റെടുത്ത് സാമൂഹിക കേരളം. കഴിഞ്ഞ വര്‍ഷം മാത്രം ഇത്തരത്തില്‍പ്പെട്ട 800-ഓളം പേരെയാണ് സംസ്ഥാന ഓര്‍ഫനേജ് കണ്‍ട്രോള്‍ ബോര്‍ഡിനു കീഴിലുള്ള സ്ഥാപനങ്ങള്‍ ഏറ്റെടുത്തത്. ഈ വര്‍ഷം ഇതുവരെ നൂറിലേറെപ്പേരെ ഏറ്റെടുത്തിട്ടുണ്ട്.കഴിഞ്ഞ ദിവസം തിരുവനന്തപുരം മെഡിക്കല്‍ കോളേജ് ആശുപത്രിയില്‍നിന്ന് മാത്രം 21 പേരെ സാമൂഹിക നീതി വകുപ്പിന്റെ നേതൃത്വത്തില്‍ പത്തനാപുരം ഗാന്ധിഭവനിലേക്ക് മാറ്റിപ്പാര്‍പ്പിച്ചിരുന്നു. സംസ്ഥാനത്ത് തിരുവനന്തപുരത്താണ് ഇത്തരത്തില്‍ നിരാലംബരായ കൂടുതല്‍ ആളുകളുള്ളത്.ചികിത്സ പൂര്‍ത്തിയായിട്ടും ബന്ധുക്കള്‍ തിരികെ കൊണ്ടുപോകാത്തതിനാല്‍ ആശുപത്രിയില്‍ തന്നെ കഴിയുന്ന 44 പേരാണ് തിരുവനന്തപുരത്തുള്ളത്. കൊച്ചിയില്‍ 16 പേര്‍ വിവിധ ആശുപത്രികളില്‍ ഏറ്റെടുക്കാന്‍ ആളില്ലാതെ കഴിയുന്നുണ്ട്. ആലപ്പുഴയില്‍ പത്തുപേരും കോട്ടയത്ത് 17 പേരും മെഡിക്കല്‍ കോളേജില്‍ ഏറ്റെടുക്കാന്‍ ആളില്ലാതെയുണ്ട്.സംസ്ഥാനത്ത് ഇപ്പോള്‍ 500-ലധികം അനാഥാലയങ്ങളിലായി 30,000-ത്തിലേറെപ്പേര്‍ കഴിയുന്നുണ്ടെന്നാണ് കണക്ക്. സംസ്ഥാന ഓര്‍ഫനേജ് കണ്‍ട്രോള്‍ ബോര്‍ഡ് പരമാവധി ആളുകളെ ഏറ്റെടുക്കാന്‍ ഇത്തരം സ്ഥാപനങ്ങള്‍ക്ക് നിര്‍ദേശം നല്‍കിയിട്ടുണ്ട്. വയോജന കേന്ദ്രങ്ങളിലേക്കും പാലിയേറ്റീവ് സ്ഥാപനങ്ങളിലേക്കുമാണ് ആശുപത്രികളില്‍ ചികിത്സ പൂര്‍ത്തിയായവരെ ഏറ്റെടുക്കുന്നത്.