വിവാഹിതയ്ക്ക് വിവാഹ വാഗ്ദാന പീഡന പരാതി നൽകാനാകില്ലെന്ന് ഹൈക്കോടതി

കൊച്ചി: വിവാഹ ബന്ധത്തിൽ തുടരുന്ന സ്ത്രീക്ക് മറ്റൊരാൾ വിവാഹ വാഗ്ദാനം നൽകി പീഡിപ്പിച്ചെന്ന പരാതി ഉന്നയിക്കാനാകില്ലെന്ന് ഹൈക്കോടതി. വിവാഹ വാഗ്ദാനം നൽകി പീഡിപ്പിച്ചെന്ന് ആരോപിക്കുന്ന കേസ് റദ്ദാക്കണമെന്നാവശ്യപ്പെട്ട് പൊലീസ് ഉദ്യോഗസ്ഥനായ പാലക്കാട് സ്വദേശി കെ സി ശ്രീരാജ് നൽകിയ ഹർജി അനുവദിച്ചാണ് ജസ്റ്റിസ് എ‌ ബദറുദ്ദീന്റെ ഉത്തരവ്. തൃശൂർ പ്രത്യേക കോടതിയുടെ പരിഗണനയിലുള്ള കേസാണ് റദ്ദാക്കിയത്. വിവാഹവാഗ്ദാനം നൽകി ലൈംഗികമായി പീഡിപ്പിച്ചെന്നായിരുന്നു യുവതിയുടെ പരാതി. എന്നാൽ യുവതി വിവാഹിതയല്ലെന്ന വിശ്വാസത്തിലാണ് വിവാഹ വാഗ്ദാനം നൽകിയതെന്നും വിവാഹിതയാണെന്നും രണ്ട് കുട്ടികളുടെ മാതാവാണെന്നും അറിഞ്ഞപ്പോൾ പിന്മാറുകയായിരുന്നുവെന്നും ഹർജിക്കാരൻ അറിയിച്ചു. വിവാഹവാഗ്ദാനം നൽകിയെന്ന് പറയുന്ന സമയത്ത് പരാതിക്കാരി മുൻപുള്ള വിവാഹ ബന്ധത്തിൽ തുടരുകയായിരുന്നു. ആരോപണങ്ങൾ വ്യാജമാണ്. ആൾമാറാട്ടം നടത്തി മറ്റു പലരിൽനിന്നും പരാതിക്കാരി പണം കൈക്കലാക്കിയതായി കേസുകൾ രജിസ്റ്റർ ചെയ്തിട്ടുണ്ടെന്നും അറിയിച്ചു. പരാതിക്കാരി വിവാഹിതയാണെന്ന് സർക്കാരും അറിയിച്ചിരുന്നു.