സ്കൂട്ടര്‍ മറിഞ്ഞു പെട്രോള്‍ ചോര്‍ന്ന് തീപിടിച്ചു’ഗുരുതരമായി പൊള്ളലേറ്റ യുവാവ് മരിച്ചു.

കുന്നംകുളം:കൊട്ടേക്കാട് സ്കൂട്ടറിന് തീപിടിച്ച് ഗുരുതരമായി പൊള്ളലേറ്റ് ചികിത്സയിലായിരുന്ന യുവാവ് മരിച്ചു.പേരാമംഗലം സ്വദേശി വിഷ്ണു (24) ആണ് മരിച്ചത്.തൃശ്ശൂർ മെഡിക്കൽ കോളേജിൽ ചികിത്സയിലിരിക്കെ ബുധനാഴ്ച രാവിലെ പത്തുമണിയോടെയാണ് മരണം സംഭവിച്ചത്.കഴിഞ്ഞ ദിവസം രാത്രി എട്ടരയോടെ തൃശൂരിൽ നിന്നും മുണ്ടൂരിലേക്കുള്ള യാത്രാമധ്യേ വിഷ്ണു സഞ്ചരിച്ചിരുന്ന സ്കൂട്ടർ കൊട്ടേക്കാട് പള്ളിക്കു മുന്നിലെ വളവിൽ വെച്ച് തെന്നി മറിയുകയായിരുന്നു.വീഴ്ചയിൽ സ്കൂട്ടറിൽ നിന്നും പെട്രോൾ ചോർന്നിരുന്നു. വീണ സ്കൂട്ടർ സ്റ്റാർട്ട് ചെയ്തപ്പോൾ തീ ആളിപ്പടരുകയായിരുന്നു. പൊള്ളലേറ്റ വിഷ്ണുവിനെ നാട്ടുകാർ ചേർന്നാണ് ആശുപത്രിയിൽ എത്തിച്ചത്.നാട്ടുകാർ വിവരമറിയിച്ചതിനെ തുടർന്ന് തൃശ്ശൂരിൽ നിന്ന് ഫയർഫോഴ്സ് എത്തിയാണ് തീ അണച്ചത്.വിയ്യൂർ പോലീസും സ്ഥലത്തെത്തിയിരുന്നു.