എറണാകുളം: ന്യൂഡൽഹിയിൽ മാധ്യമപ്രവർത്തകർക്ക് നേരെ നടന്ന അതിക്രമത്തിലും മർദ്ദനത്തിലും കേരള മീഡിയ പേഴ്സൺസ് യൂണിയൻ (കെ.എം.പി.യു) ശക്തമായി പ്രതിഷേധിച്ചു. കുറ്റക്കാർക്കെതിരെ കർശനമായ നടപടി സ്വീകരിക്കണമെന്ന് കെ.എം.പി.യു സംസ്ഥാന പ്രസിഡന്റ് പീറ്റർ ഏഴിമല ആവശ്യപ്പെട്ടു. എറണാകുളം ഇടപ്പള്ളി ചങ്ങമ്പുഴ ഓഡിറ്റോറിയത്തിൽ നടന്ന സംഘടനയുടെ ജില്ലാ പ്രവർത്തക സംഗമത്തിൽ പ്രമേയം അവതരിപ്പിച്ച് മുഖ്യപ്രഭാഷണം നടത്തുകയായിരുന്നു അദ്ദേഹം.
പത്ര-ദൃശ്യ-ഡിജിറ്റൽ മാധ്യമ രംഗത്ത് പ്രവർത്തിക്കുന്നവരുടെ സ്വതന്ത്ര ട്രേഡ് യൂണിയൻ സംഘടനയായ കെ.എം.പി.യുവിന്റെ ജില്ലാ സംഗമം കൊച്ചി ഡെപ്യൂട്ടി മേയർ വി.ആർ. സുധീർ ഉദ്ഘാടനം ചെയ്തു. എറണാകുളം ജില്ലാ പ്രസിഡന്റ് ഷാന്റി തോമസ് ചടങ്ങിൽ അധ്യക്ഷത വഹിച്ചു.
ചടങ്ങിൽ മുഖ്യാതിഥിയായി പങ്കെടുത്ത പ്രമുഖ നടനും മിമിക്രി ആർട്ടിസ്റ്റുമായ കലാഭവൻ കെ.എസ്. പ്രസാദ് സംസാരിച്ചു. സമൂഹത്തിലെ ചെറുതും വലുതുമായ പ്രശ്നങ്ങൾ ജനങ്ങളിലേക്ക് എത്തിക്കുന്നതിലും അവയ്ക്ക് വേഗത്തിൽ പരിഹാരം കണ്ടെത്തുന്നതിലും മാധ്യമപ്രവർത്തനം വലിയ പങ്കാണ് വഹിക്കുന്നതെന്ന് അദ്ദേഹം അഭിപ്രായപ്പെട്ടു.
ദൂരദർശൻ, മലയാള മനോരമ മുൻ പ്രിൻസിപ്പൽ ക്യാമറാമാൻ പി.ജെ. ചെറിയാനെ യോഗത്തിൽ പ്രത്യേകമായി ആദരിച്ചു. വിഷ്വൽ മീഡിയ അവാർഡ് ജേതാവ് മോഹൻ ചിക്കിലോട്, പ്രിന്റ് മീഡിയ അവാർഡ് ജേതാവ് എം. അബ്ദുൾ ഖാദർ, മാധ്യമ പുരസ്കാരം നേടിയ കുറ്റനാട് മാതൃഭൂമി ലേഖകൻ സി. മൂസ പെരിങ്ങോട് എന്നിവരെ പൊന്നാടയണിയിച്ചും മൊമെന്റോ നൽകിയും ചടങ്ങിൽ ആദരിക്കുകയുണ്ടായി. കൂടാതെ യൂണിയൻ അംഗങ്ങൾക്കുള്ള ഐഡി കാർഡുകളുടെ വിതരണവും നടന്നു.
സംസ്ഥാന സെക്രട്ടറി സെയ്ദ്, ജില്ലാ സെക്രട്ടറി സി.ഡി. സലിംകുമാർ, മീഡിയ കോഡിനേറ്റർ ബിജോയ് ആന്റൂ സ്രാമ്പിക്കൽ തുടങ്ങിയവർ സംസാരിച്ചു. ജില്ലാ ഭാരവാഹികളായ പി.എം. അജ്മൽ, രശ്മി രഘുരാജ്, പി.ജെ. സാജു, സൂര്യ, ജീന ജോസ് എന്നിവർ പരിപാടികൾക്ക് നേതൃത്വം നൽകി.
