ന്യൂഡൽഹി: ചീഫ് ജസ്റ്റിസ് സൂര്യകാന്തിന്റെ പരാമർശത്തെ തുടർന്നുണ്ടായ കോക്ക്റോച്ച് ജനതാ പാർട്ടിക്ക് (സിജെപി) പിന്നാലെ സോഷ്യൽ മീഡിയയിൽ പുതിയൊരു പ്രസ്ഥാനം കൂടി ശ്രദ്ധേയമാകുന്നു. ‘മഖി ജനതാ പാർട്ടി’ (എംജെപി) എന്നാണ് ഈ പുതിയ കൂട്ടായ്മയുടെ പേര്. ഹിന്ദിയില്‍ മഖി എന്നാല്‍ ഈച്ച എന്നാണ്.
72 മണിക്കൂറിനുള്ളിൽ ഇൻസ്റ്റാഗ്രാമിൽ 40 ലക്ഷത്തിലധികം കാഴ്ചക്കാരെയും 3.3 ലക്ഷത്തിലധികം ഫോളോവേഴ്സിനെയും നേടിയതായി ചൊവ്വാഴ്ച എംജെപി അവകാശപ്പെട്ടു. ആര്യൻ എന്ന വിദ്യാർത്ഥിയാണ് സംഘടനയുടെ സ്ഥാപകൻ എന്നാണ് ഇൻസ്റ്റാഗ്രാം പേജിൽ വ്യക്തമാക്കുന്നത്. കൂടാതെ, പാർട്ടിക്കായി വക്താക്കളെ തേടുന്നുണ്ടെന്നും പേജിൽ സ്റ്റോറി പ്രത്യക്ഷപ്പെട്ടിട്ടുണ്ട്.
അക്കൗണ്ട് വിവരങ്ങൾ പ്രകാരം 2021 ജൂണിൽ ആരംഭിച്ച ഈ സോഷ്യൽ മീഡിയ പേജ്, ‘മഖി ജനതാ പാർട്ടി’ എന്ന പേര് സ്വീകരിക്കുന്നതിന് മുൻപ് എട്ട് തവണ യൂസർനെയിം മാറ്റിയിട്ടുണ്ട്.
ഡൽഹിയിൽ ഒക്ടോബർ 10ന് സിജെപി നിശ്ചയിച്ചിരുന്ന പ്രക്ഷോഭത്തിന് മുന്നോടിയായി ഏർപ്പെടുത്തിയേക്കാവുന്ന വിലക്കുകളെ ചോദ്യം ചെയ്തുകൊണ്ട് ചീഫ് ജസ്റ്റിസ് നടത്തിയ ‘ചുറ്റിക കൊണ്ട് ഈച്ചയെ കൊല്ലാൻ കഴിയില്ല’ എന്ന പരാമർശമാണ് ‘മഖി ജനതാ പാർട്ടി’ എന്ന പേരിന് പ്രചോദനമായത്. സുരക്ഷാ മുൻകരുതലുകൾ മുൻനിർത്തി പൊതുഗതാഗതം നിയന്ത്രിക്കാമെങ്കിലും, മൊത്തത്തിലുള്ള സംവിധാനങ്ങൾ പൂർണ്ണമായി സ്തംഭിപ്പിക്കാൻ കഴിയില്ലെന്നായിരുന്നു കോടതി നിരീക്ഷണം.
ഒക്ടോബർ 9ന് കേസ് പരിഗണിക്കുന്നതിനിടയിലായിരുന്നു സുപ്രിംകോടതിയുടെ പരാമര്‍ശം. “നിങ്ങൾക്ക് നിയന്ത്രണങ്ങൾ ഏർപ്പെടുത്താം, എന്നാൽ എല്ലാ കാര്യങ്ങളും പൂർണ്ണമായി നിർത്തിവെക്കാൻ കഴിയില്ല, അധികാരികൾക്ക് ഒരു ഈച്ചയെ കൊല്ലാൻ ചുറ്റിക ഉപയോഗിക്കാൻ കഴിയില്ല”- എന്നായിരുന്നു കോടതിയുടെ പരാമര്‍ശം.
