തിരുവനന്തപുരം: സംസ്ഥാനത്ത് ഇന്നും വൈദ്യുതി നിയന്ത്രണത്തിന് സാധ്യത. നിലവിൽ 550 മെഗാവാട്ട് വൈദ്യുതിയുടെ കുറവാണ് നേരിടുന്നത്. പീക്ക് സമയങ്ങളിൽ ആവശ്യത്തിന് വൈദ്യുതി ലഭ്യമായില്ലെങ്കിൽ വൈകീട്ട് 6 മണിക്ക് ശേഷം നിയന്ത്രണം ഏർപ്പെടുത്തേണ്ടി വരുമെന്നാണ് മുന്നറിയിപ്പ്.
ഇന്ന് ആകെ 800 മെഗാവാട്ടിന്റെ കുറവുണ്ടായിരുന്നെങ്കിലും, പീക്ക് സമയത്തേക്ക് ഡൽഹിയിൽ നിന്നും ഹരിയാനയിൽ നിന്നും 250 മെഗാവാട്ട് ഉറപ്പാക്കിയിട്ടുണ്ട്. എന്നിരുന്നാലും 550 മെഗാവാട്ടിന്റെ കുറവാണുള്ളത്.
550 മെഗാവാട്ടിന്റെ കുറവ് പരിഹരിക്കാൻ റിയൽ ടൈം മാർക്കറ്റിൽ നിന്ന് ആവശ്യ സമയത്ത് വൈദ്യുതി ലഭ്യമാക്കിയിരിക്കണം. എങ്കിൽ മാത്രമേ പ്രതിസന്ധി തരണം ചെയ്യാൻ സാധിക്കുകയുള്ളൂ. നിലവിൽ റിയൽ ടൈം മാർക്കറ്റിൽ നിന്ന് വൈദ്യുതി ലഭ്യമാകുമോയെന്നതിൽ ഉറപ്പ് ലഭിച്ചിട്ടില്ല. അഞ്ച് ദിവസത്തെ ഇടവേളയ്ക്ക് ശേഷം ഇന്നലെയാണ് വീണ്ടും വൈദ്യുതി നിയന്ത്രണം ഏർപ്പെടുത്തേണ്ടിവന്നത്. ഇന്നും സമാനമായ സാഹചര്യമാണ് സംസ്ഥാനത്തുള്ളത്.
