ചങ്ങരംകുളം:ഭരണം മാറിയിട്ടും ശാപമോക്ഷമില്ലാതെ ജനങ്ങള്‍ക്ക് ദുരിതം വിതക്കുകയാണ് ചങ്ങരംകുളത്ത് പ്രവര്‍ത്തിക്കുന്ന ആലംകോട് വില്ലേജ് ഓഫീസ്.ചങ്ങരംകുളം ഹൈവെ ജംഗ്ഷനില്‍ കോടികള്‍ വില മതിക്കുന്ന റവന്യൂ ഭൂമിയില്‍ പ്രവര്‍ത്തിച്ചിരുന്ന ആലംകോട് വില്ലേജ് ഓഫീസ് കെട്ടിടം തകര്‍ച്ചാ ഭീഷണിയില്‍ ആയതോടെയാണ് പഞ്ചായത്ത് കെട്ടിടത്തിലെ കടമുറിയിലേക്ക് താല്‍കാലികയായി വില്ലേജ് ഓഫീസിന്റെ പ്രവര്‍ത്തനം മാറ്റിയത്.
റവന്യൂഭൂമി പഞ്ചായത്തിന് കൈമാറി പഞ്ചായത്തിന്റെ സ്ഥലത്ത് വില്ലേജിന് കെട്ടിടം നിര്‍മിച്ച് നല്‍കാനുള്ള ധാരണ ഉണ്ടായെങ്കിലും ഉദ്ധ്യോഗസ്ഥ തലത്തിലെ രാഷ്ട്രീയ വടംവലികള്‍ പദ്ധതി മുടക്കി.വര്‍ഷങ്ങള്‍ നീണ്ട അനിശ്ചിതത്വത്തിനിടയില്‍ മാസങ്ങള്‍ക്ക് മുമ്പ് വില്ലേജിന് സ്വന്തം ഭൂമിയില്‍ തന്നെ കെട്ടിടം നിര്‍മിക്കാന്‍ 40 ലക്ഷം രൂപ അനുലദിക്കുകയും ടെന്‍ഡര്‍ നല്‍കുകയും ചെയ്തിരുന്നു.പദ്ധതിയുടെ ഉദ്ഘാടനം കഴിഞ്ഞ് അതികം കഴിയും മുമ്പ് ടെന്റര്‍ ഏറ്റെടുത്ത വ്യക്തി മരണപ്പെട്ടത് മൂലം പ്രവൃത്തി ആരംഭിച്ചില്ല.
നിലവില്‍ പഞ്ചായത്ത് കെട്ടിടത്തിലെ വാടക മുറിയില്‍ പ്രവര്‍ത്തിക്കുന്ന വില്ലേജിലേക്ക് ജനങ്ങള്‍ക്ക് കടന്ന് ചെല്ലാന്‍ സുരക്ഷാമുന്‍കരുതലുകള്‍ വേണ്ട അവസ്ഥയിലാണ്.ഓഫീസിനകത്ത് കുണ്ടും കുഴിയും നിറഞ്ഞ് ജീവനക്കാര്‍ക്ക് ഇരിക്കാന്‍ കസേര പോലും ഇടാന്‍ കഴിയാത്ത അവസ്ഥയാണെന്ന് ജീവനക്കാര്‍ പറയുന്നു.കഴിഞ്ഞ ദിവസം നികുതി അടക്കാന്‍ എത്തിയ പന്താവൂര്‍ സ്വദേശി സുബൈര്‍ എന്നയാളുടെ കാലിന് വില്ലേജിന് അകത്തുള്ള കുഴിയില്‍ ചാടി പരിക്കേറ്റത് വലിയ പ്രതിഷേധങ്ങള്‍ക്കാണ് ഇടയാക്കിയത്.കാലിന് പരിക്കേറ്റ സുബൈര്‍ ആശുപത്രിയില്‍ ചികിത്സ തേടി വിശ്രമത്തിലാണ്.ഫയലുകള്‍ സൂക്ഷിക്കാന്‍ പോലും സൗകര്യമില്ലാത്ത ഇടുങ്ങിയ മുറിയില്‍ സുപ്രധാന ഫയലുകള്‍ പോലും സുരക്ഷിതമല്ലാത്ത അവസ്ഥയിലാണ്.വില്ലേജിന്റെ പ്രവര്‍ത്തനം സൗകര്യപ്രദമായ മറ്റൊരു സ്ഥലത്തേക്ക് മാറ്റണമെന്ന ആവശ്യവും ശക്തമാണ്.
