ചമ്മന്നൂർ: കാർഷിക മേഖലയിലെ മികച്ച പ്രവർത്തനങ്ങൾ മുൻനിർത്തി മികച്ച സമ്മിശ്ര കർഷകനുള്ള പുന്നയൂർക്കുളം ഗ്രാമപഞ്ചായത്തിന്റെ പുരസ്കാരം ചമ്മന്നൂർ സ്വദേശി അലി പഷ്ണത്തയിലിന് ലഭിച്ചു.
കർഷകദിനാചരണത്തിന്റെ ഭാഗമായി ആഗസ്റ്റ് 17 തിങ്കളാഴ്ച വൈകിട്ട് 3:00-ന് ആൽത്തറ ഗ്രീൻലാൻഡ് ഓഡിറ്റോറിയത്തിൽ സംഘടിപ്പിച്ച ചടങ്ങിൽ ഗുരുവായൂർ എം.എൽ.എ. എൻ.കെ. അക്ബർ ഉപഹാര സമർപ്പണം നിർവ്വഹിച്ചു. പുന്നയൂർക്കുളം ഗ്രാമപഞ്ചായത്ത് പ്രസിഡന്റ് ഹസ്സൻ തളികശേരി ചടങ്ങിൽ അധ്യക്ഷത വഹിച്ചു.
സാമൂഹിക-വിദ്യാഭ്യാസ മേഖലകളിൽ സജീവ സാന്നിധ്യമായ അദ്ദേഹം അമൽ ചാരിറ്റബിൾ ട്രസ്റ്റ്, ധർമ ചാരിറ്റബിൾ സൊസൈറ്റി, Mec7 അമൽ സെന്റർ എന്നിവയുടെ ചെയർമാനായും, ചമ്മന്നൂർ മഹല്ല് പള്ളി പുനരുദ്ധാരണ കമ്മിറ്റി കൺവീനറായും സേവനമനുഷ്ഠിച്ചു വരുന്നു.
അമൽ ഇംഗ്ലീഷ് സ്കൂളിനെ ഹരിത ക്യാമ്പസായി മാറ്റിയെടുക്കുന്നതിൽ അലി പഷ്ണത്തയിലിന്റെ കൃഷിപ്രേമവും നിരന്തര പ്രയത്നവും നിർണ്ണായക പങ്കാണ് വഹിച്ചിട്ടുള്ളത്. ക്യാമ്പസ്സിലെ പച്ചപ്പും കൃഷി ഇടങ്ങളും അദ്ദേഹത്തിന്റെ കാർഷിക സംസ്കാരത്തോടുള്ള പ്രതിബദ്ധതയ്ക്ക് തെളിവാണ്.നാടിന് അഭിമാനമായി മാറിയ അദ്ദേഹത്തിന് വിവിധ മേഖലകളിൽ നിന്നുള്ള പ്രമുഖർ ആശംസകൾ അറിയിച്ചു.
