ഡിവൈഎഫ്ഐ 16-മത് സംസ്ഥാന സമ്മേളനം ആഗസ്ത് 19 മുതൽ 22 വരെ തൃശൂരിൽ വെച്ച് നടക്കുമെന്ന് വി കെ സനോജ്. പാനൽ ചർച്ചകൾ, സെമിനാറുകൾ അടക്കം വിവിധ അനുബന്ധ പരിപാടികൾ സംഘടിപ്പിച്ചതായും അതിൽ ആയിരക്കണക്കിന് പേർ പങ്കെടുത്തതായും വി കെ സനോജ് പറഞ്ഞു.
20 ന് പ്രതിനിധി സമ്മേളനം നടൻ പ്രകാശ് രാജ് ഉദ്ഘാടനം ചെയ്യുമെന്നും അദ്ദേഹം പറഞ്ഞു. 22 ന് പൊതുസമ്മേളനം പിണറായി വിജയൻ ഉദ്ഘാടനം ചെയ്യും.1 ലക്ഷം പേർ അണിനിരക്കുന്ന റാലി സംഘടിപ്പിക്കും. ഐഷി ഘോഷ് ഉൾപ്പെടെയുള്ളവർ റാലിയിൽ പങ്കെടുക്കുമെന്നും സനോജ് പറഞ്ഞു.
52 ലക്ഷം അംഗങ്ങളെ പ്രതിനിധീകരിച്ച് 590 പ്രതിനിധികൾ സമ്മേളനത്തിൽ പങ്കെടുക്കും. 19 ന് പതാക ഉയർത്തുന്നതോടെ സമ്മേളന നടപടികൾ ആരംഭിക്കും. ആഗസ്ത് 15 യങ്ങ് ഇന്ത്യ എന്ന പേരിൽ സംസ്ഥാനത്ത് വിവിധ കേന്ദ്രങ്ങളിൽ പ്രതിഷേധം സംഘടിപ്പിക്കും. തൊഴിൽ നിഷേധത്തിനെതിരെ പകരം ചോദിക്കുക എന്നതാണ് മുദ്രാവാക്യമെന്നും അദ്ദേഹം പറഞ്ഞു.
യുവധാര യുവ സാഹിത്യ പുരസ്കാരം 2026 ധന്യ ആർ, വിവീഷ് മണിയൂർ എന്നിവർ സ്വന്തമാക്കി. ജനിതക മുഖം എന്ന കവിതയ്ക്കാണ് ധന്യ ആറിന് പുരസ്കാരം ലഭിച്ചത് അതേസമയം, മോനിയ ലല്ല എന്ന കഥയ്ക്കാണ് വിവീഷ് മണിയൂരിന് ലഭിച്ചതെന്നും സനോജ് പറഞ്ഞു.
ഡിവൈഎഫ്ഐയ്ക്ക് പാർട്ടി പ്രായപരിധി നിശ്ചയിച്ചെന്ന വാർത്ത തെറ്റാണെന്നും വി കെ സനോജ് പറഞ്ഞു. ഡിവൈഎഫ്ഐയുടെ ഭരണഘടനയാണ് അക്കാര്യം തീരുമാനിക്കുക. ഭാരവാഹിത്വത്തിലേക്ക് വനിതകളെ പ്രോത്സാഹിക്കണം. എല്ലാ ഘടകങ്ങളിലും വനിതാ പ്രാതിനിധ്യം വർധിപ്പിക്കണമെന്ന് തീരുമാനിച്ചിരുന്നെന്നും അദ്ദേഹം പറഞ്ഞു.
