നസംഖ്യാ നിയന്ത്രണത്തിനെതിരെ കടുത്ത പ്രതികരണവുമായി ആര്.എസ്.എസ്. മേധാവി മോഹന് ഭാഗവത്. ഒരു സമൂഹത്തിന്റെ നിലനില്പ്പിന് ജനസംഖ്യ സ്ഥിരത അനിവാര്യമാണെന്നും ഒരു കുടുംബത്തില് കുറഞ്ഞത് മൂന്ന് കുട്ടികള് എങ്കിലും ഉണ്ടായിരിക്കണമെന്നുമാണ് മോഹന് ഭാഗവത് ആഹ്വാനം ചെയ്തിരിക്കുന്നത്. ജനസംഖ്യ 2.1 എന്ന ഫെര്ട്ടിലിറ്റി നിരക്കിലും താഴെയാകുന്നത് വംശനാശത്തിന്റെ ലക്ഷണമായാണ് ആധുനിക ജനസംഖ്യ പഠനങ്ങള് വിലയിരുത്തുന്നതെന്ന് അദ്ദേഹം അഭിപ്രായപ്പെട്ടു. ജനസംഖ്യ കുറയുന്നത് അങ്ങേയറ്റം ആശങ്കാജനകമാണ്. അതുകൊണ്ട് രാജ്യത്തെ ജനസംഖ്യ 2.1 എന്ന നിരക്കിലും താഴെയാകരുതെന്നും മോഹന് ഭാഗവത് പറഞ്ഞു.നമ്മുടെ രാജ്യത്തെ ജനസംഖ്യാനയം 1998-ലോ 2002-ലോ രൂപപ്പെടുത്തിയിട്ടുള്ളതാണ്. ഇതില് ജനസംഖ്യാനിരക്ക് 2.1-ല് കുറയരുതെന്ന് കൃത്യമായി പരാമര്ശിച്ചിട്ടുണ്ട്. ജനസംഖ്യാശാസ്ത്രമനുസരിച്ച് ഒരു കുടുംബത്തില് കുറഞ്ഞത് മൂന്ന് കുട്ടികള് എങ്കിലും വേണമെന്നാണ് പഠനങ്ങളെന്നും അദ്ദേഹം പറഞ്ഞു. ആര്.എസ്.എസ്. നേതാവിന്റെ പ്രസ്താവന വലിയ രാഷ്ട്രീയ ചര്ച്ചകള്ക്ക് വഴിവെച്ചിരിക്കുകയാണ്.
ബി.ജെ.പി. നേതാക്കള് ജനസംഖ്യാ നിയന്ത്രണത്തെ കുറിച്ച് സംസാരിക്കുമ്പോള് ആര്.എസ്.എസ്. നേതാവ് കൂടുതല് കുട്ടികളെ ജനിപ്പിക്കണമെന്നാണ് പറയുന്നത്. ആര്.എസ്.എസും ബി.ജെ.പിയും അഭിപ്രായ സമന്വയത്തിലെത്തണം. സര്ക്കാര് ജനസംഖ്യാനിയന്ത്രണ പ്രചരണങ്ങള് നടത്തുമ്പോള് ഇത്തരം പ്രസ്താവനങ്ങള് അംഗീകരിക്കാനാവില്ലെന്ന് ആര്.ജെ.ഡി. നേതാവ് മൃത്യുഞ്ജയ് തിവാരി പറഞ്ഞു.
ഇത്തരം പ്രസ്താവനകള് നടത്തുന്നതിന് മുമ്പ് ആര്.എസ്.എസ്. നേതാവ് ജനസംഖ്യാനിയന്ത്രണത്തെ കുറിച്ച് സ്ഥിരമായി സംസാരിക്കുന്ന ബി.ജെ.പിക്കാരുമായി കൂടിയാലോചിക്കണമായിരുന്നു. ബീഹാര് മുഖ്യമന്ത്രിയാണ് ഇക്കാര്യത്തില് മാതൃകാപരമായ നിലപാട് സ്വീകരിച്ചത്. സ്ത്രീകള്ക്ക് വിദ്യാഭ്യാസം ഉറപ്പാക്കുന്നതിലൂടെ ജനസംഖ്യാനിയന്ത്രണം നടപ്പാക്കുമെന്നായിരുന്നു അദ്ദേഹത്തിന്റെ നിലപാടെന്ന് ജെ.ഡി.യു വക്താവ് അരവിന്ദ് നിഷാദ് പറഞ്ഞു.
