പൊന്നാനി :കെ എസ് ആർ ടി സി ദീർഘ ദൂര ബസ്സിൽ ഉറങ്ങിപോയ യാത്രക്കാരന്റെ മൊബൈൽ ഫോണും രേഖകളും അടങ്ങിയ ബാഗ് മോഷണം നടത്തിയ പ്രതിയെ പൊന്നാനി പോലീസ് പിടികൂടി. കാടാമ്പുഴ താണിയപ്പൻ കുന്നിൽ താമസിക്കുന്ന പള്ളിയാലിൽ നൗഫൽ (32) ശെയാണ് പൊന്നാനി സിഐ സതീഷ് കുമാറിന്റെ നേതൃത്വത്തിലുള്ള അന്വേഷണസംഘം അറസ്റ്റ് ചെയ്തത്.കഴിഞ്ഞ ബുധനാഴ്ച രാത്രി പത്തു മണിയോടെയാണ് മാണൂരിൽ വെച്ച് തൃശൂർ കൂളിമുട്ടം സ്വദേശി നജീബിന്റെ വില കൂടിയ മൊബൈൽ ഫോണുകളും രേഖകളും അടങ്ങിയ ബാഗ് മോഷണം പോയത്.
ബസ്സില് ഉറങ്ങുകയായിരുന്ന നജീബിന്റെ ബാഗ് മറ്റാരും കാണാതെ തന്ത്ര പൂർവ്വം തന്റെ ബാഗിന്റെ ഉള്ളിൽ ഒതുക്കി പ്രതി നൗഫൽ ബസ്സിൽ നിന്നും ഇറങ്ങി പോവുകയായിരുന്നു.പ്രതി മോഷ്ടിച്ച മൊബൈല് ഫോൺ സുഹൃത്തില് നിന്ന് പോലീസ് അന്വേഷണത്തിൽ കണ്ടെത്തുകയും ബസ്സിലെ സിസിടിവി ദൃശ്യങ്ങൾ പരിശോധിച്ച് നടത്തിയ അന്വേഷണത്തിൽ പ്രതിയെ തിരിച്ചറിഞ്ഞ് കാടാമ്പുഴയിൽ വെച്ച് പ്രതിയെ പിടി കൂടുകയുമായിരുന്നു.പൊന്നാനി പോലീസ് ഇൻസ്പെക്ടർ സതീഷ്കുമാറിന്റെ നേതൃത്വത്തിൽ എസ്ഐമാരായ വിനോദ് ടിഎം അനന്ത ലക്ഷ്മി,സീനിയർ സിവിൽ പോലീസ് ഓഫീസർമാരായ നാസർ, പ്രശാന്ത് കുമാർ എസ്, സിവിൽ പോലീസ് ഓഫീസർ സജിൽ എന്നിവർ അടങ്ങിയ സംഘമാണ് അന്വേഷണം നടത്തി പ്രതിയെ അറസ്റ്റ് ചെയ്തത്. പ്രതിയുടെ പേരിൽ സമാനമായി ട്രെയിനുകളിൽ നിന്ന് യാത്രകാരുടെ ബാഗ് മോഷ്ടിച്ച കേസ് നിലവിലുണ്ട്.2 കിലോ കഞ്ചാവുമായി നാല് വർഷം മുമ്പ് കൽപകഞ്ചേരി പോലീസ് ഇയാളെ പിടി കൂടിയിരുന്നു. ലഹരി ഉപയോഗിക്കുന്നതിനു പണം കണ്ടെത്താൻ ആണ് പ്രതി മോഷണം നടത്തി വരുന്നതെന്ന് ഉദ്ധ്യോഗസ്ഥര് പറഞ്ഞു. പൊന്നാനി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
