മെസ്സിയേയും സംഘത്തിനേയും പുറത്താക്കാന്‍ വേണ്ടതെല്ലാം ചെയ്തിട്ടുണ്ടെന്ന് പ്രഖ്യാപിച്ച് എത്തിയിരിക്കുകയാണ് ഘാനയുടെ മന്ത്രവാദി. നോക്കൗട്ടില്‍ കേപ് വെര്‍ദെ അര്‍ജന്റീനയെ അട്ടിമറിക്കും എന്നാണ് ഘാനയുടെ കുമ്പിടിയുടെ പ്രവചനം. കളത്തിനു പുറത്തെ മന്ത്രവാദി ജയിക്കുമോ അതോ കളത്തിലെ ഫുട്‌ബോള്‍ മജീഷ്യന്‍ ജയിക്കുമോ എന്ന് കാത്തിരുന്നു കാണണം.
കാല്‍പന്തിന്റെ ചതുരംഗക്കളിയില്‍ മറുതന്ത്രങ്ങള്‍ ചമയ്ക്കാന്‍ മെസിക്കാകും. എതിരാളികളുടെ പത്മവ്യൂഹ പൂട്ടുകളെ പൊട്ടിക്കാനുള്ള മികവും അയാള്‍ക്കുണ്ട്. പക്ഷേ ഇതങ്ങനെയല്ലല്ലോ… മന്ത്രവാദമല്ലേ. ഫുട്‌ബോളിന്റെ എബിസിഡിയില്‍ ഇല്ലാത്ത യമണ്ടന്‍ മന്ത്രവാദം.
കേപ് വെര്‍ദെ അര്‍ജന്റീന പോരാട്ടത്തില്‍ കളത്തില്‍ 11 പേര്‍ വീതമാണ് ഉള്ളതെങ്കില്‍. പുറത്തൊരു പന്ത്രണ്ടാമന്‍ ഇരിപ്പുണ്ടെന്നാണ് പൊതുവെയുള്ള പറച്ചില്‍. കളിയെ മന്ത്രവാദം കൊണ്ടും ആഭിചാര ക്രിയകൊണ്ടും നിയന്ത്രിക്കുന്ന കുപ്രസിദ്ധനായൊരു മന്ത്രവാദി. കളത്തിലെ മജീഷ്യന്‍ മെസിയെ തളര്‍ത്താന്‍ കര്‍മങ്ങളും കൂടോത്രവുമായി ഘാനയുടെ കുപ്രസിദ്ധ മന്ത്രവാദി നാനാ ക്വാകു ബോണ്‍സം എത്തിയതാണ് പുതിയ ചര്‍ച്ചാ വിഷയം. നോക്കൗട്ടില്‍ കേപ് വെര്‍ദെ അര്‍ജന്റീനയെ തോല്‍പ്പിക്കാന്‍ വേണ്ട വിദ്യയെല്ലാം പയറ്റുമെന്നാണ് ഘാനയുടെ കുമ്പിടി പറയുന്നത്.
ഘാനയ്‌ക്കെതിരെ കളത്തിലിറങ്ങിയ ഇംഗ്ലണ്ടിന്റെ ഹാരി കെയ്‌നെ തളര്‍ത്തുമെന്നായിരുന്നു ആദ്യ പ്രഖ്യാപനം. ഇംഗ്ലണ്ട് ഘാനയോട് സമനിലയില്‍ കുരുങ്ങിയപ്പോള്‍ മന്ത്രവാദം ഏറ്റോ എന്ന് തെല്ലൊന്ന് സംശയിച്ചു. കെയ്‌നിന്റെ ശാപം പിന്‍വലിച്ചെന്ന് മന്ത്രവാദി പറഞ്ഞതിന് പിന്നാലെ പാനമയ്‌ക്കെതിരെ ഇംഗ്ലീഷ് നായകന്‍ ഗോളടിച്ചതും കൗതുകമായിരുന്നു.
എന്തായാലും നാനാ ക്വാകു ബോണ്‍സമിന്റെ ഫോറിന്‍ കൂടോത്രത്തിന് ഇനി കേരളത്തിലെ മെസി ആരാധകരുടെ വക നാടന്‍ കൂടോത്രം വല്ലതും ഉണ്ടാകുമോ എന്ന തമാശയും സോഷ്യല്‍ മീഡിയയില്‍ നിറയുന്നുണ്ട്. ഈ കൂടോത്രം കൊണ്ടൊന്നും മെസിയെന്ന ഇടങ്കാലന്‍ ഇടിമിന്നല്‍ പിണറിനെ ജയിക്കാനാകില്ലെന്ന അഭിപ്രായവും സജീവമാകുന്നുണ്ട്. എന്തായാലും മന്ത്രവാദം ജയിക്കുമോ മെസ്സിയുടെ മാന്ത്രികത ജയിക്കുമോ എന്ന് കളത്തില്‍ കാണാം.
