ചങ്ങരംകുളം:വളയംകുളം അസ്സാബാഹ് ആർട്സ് & സയൻസ് കോളേജ്, ജൂൺ 21 ഇന്റർനാഷണൽ യോഗ ദിനാചരണത്തിന്റെ ഭാഗമായി ‘മെഗാ യോഗ സെഷൻ’ സംഘടിപ്പിച്ചു.കോളേജിലെ ഫിസിക്കൽ എഡ്യൂക്കേഷൻ വിഭാഗവും എൻ.എസ്.എസ് യൂണിറ്റും സംയുക്തമായാണ് പരിപാടി സംഘടിപ്പിച്ചത്.കോളേജ് ഓപ്പൺ ഓഡിറ്റോറിയത്തിൽ രാവിലെ ഒൻപത് മുതൽ പതിനൊന്ന് വരെ നടന്ന യോഗ സെഷൻ ആലംകോട് ഗ്രാമ പഞ്ചായത്ത് പ്രസിഡന്റ് ആസിയ ഇബ്രാഹിം ഉദ്ഘാടനം ചെയ്തു.
നിത്യജീവിതത്തിൽ യോഗ നൽകുന്ന മാനസിക-ശാരീരിക ഉന്മേഷം വ്യക്തിത്വ വികസനത്തിന് അനിവാര്യമാണെന്ന് അവർ അഭിപ്രായപ്പെട്ടു.പ്രശസ്ത യോഗ & ഫിസിക്കൽ ട്രെയിനർ ബാബു സലിം യോഗ സെഷന് നേതൃത്വം നൽകി.എൻ.എസ്.എസ് പ്രോഗ്രാം ഓഫീസർ അബ്ദുൽ റഹ്മാൻ. പി, ഫിസിക്കൽ എഡ്യൂക്കേഷൻ മേധാവി അൻഷാദ്.കെ.ട്ടി തുടങ്ങിയവർ സംസാരിച്ചു.വിദ്യാർത്ഥികളും ജീവനക്കാരും ഉൾപ്പെടെ നിരവധി പേർ പരിപാടിയിൽ പങ്കെടുത്തു.
യോഗയുടെ പ്രാധാന്യം, ശാരീരികവും മാനസികവുമായ ആരോഗ്യം എന്നിവയെക്കുറിച്ച് അവബോധം വളർത്തുക എന്ന ലക്ഷ്യത്തോടെയാണ് പരിപാടിസംഘടിപ്പിച്ചത്.യോഗാഭ്യാസത്തിലൂടെ ലഭിച്ച ശാരീരികവും മാനസികവുമായ ഉണർവ് പങ്കെടുത്തവർക്ക് വേറിട്ട അനുഭവമായി.
