ചങ്ങരംകുളം:മൂക്കുതല പിസിഎന്‍ ഗവണ്‍മെന്റ് ഹയര്‍ സെക്കണ്ടറി സ്കൂള്‍ 85-86 എസ്എസ്എല്‍സി ബാച്ച് ‘കളിമുറ്റം’ എസ്എസ്എല്‍സി പ്ലസ് ടു, ഉന്നത വിദ്യാഭ്യാസ മേഖലകളിൽ മികച്ച വിജയം നേടിയ കളിമുറ്റം അംഗങ്ങളുടെ മക്കള്‍ക്ക് ഗൈഡ്‌ലൈൻ ക്ലാസും ഉപഹാര സമർപ്പണവും നടത്തി.
വളയംകുളത്തെ റൈസ് ആൻഡ് ഫിഷ് ഓഡിറ്റോറിയത്തിൽ നടന്ന ചടങ്ങില്‍ കളിമുറ്റം അംഗങ്ങളും കുടുംബാംഗങ്ങളും വിദ്യാർത്ഥികളും പങ്കെടുത്തു.പരിപാടിയില്‍ വിവിധ മേഖലകളിൽ മികച്ച നേട്ടം കൈവരിച്ച വിദ്യാർത്ഥികളെ ആദരിച്ച് ഉപഹാരങ്ങൾ വിതരണം ചെയ്തു.
വിദ്യാഭ്യാസ രംഗത്തെ മികവുകൾക്ക് അംഗീകാരം നൽകുകയും വിദ്യാർത്ഥികൾക്ക് ഭാവി പഠന-തൊഴിൽ സാധ്യതകളെക്കുറിച്ച് അവബോധം സൃഷ്ടിക്കുകയുമായിരുന്നു പരിപാടിയുടെ പ്രധാന ലക്ഷ്യം.ചടങ്ങിന്റെ ഭാഗമായി ഇൻഡോ-ജർമ്മൻ അക്കാദമിയുടെ നേതൃത്വത്തിൽ ജർമ്മനിയിലെ ഉന്നത വിദ്യാഭ്യാസ സാധ്യതകളെക്കുറിച്ചുള്ള പ്രത്യേക മാർഗനിർദ്ദേശ ക്ലാസ് സംഘടിപ്പിച്ചു. വിദേശ വിദ്യാഭ്യാസം, പഠന അവസരങ്ങൾ, സ്കോളർഷിപ്പുകൾ, തൊഴിൽ സാധ്യതകൾ തുടങ്ങിയ വിഷയങ്ങളിൽ വിദ്യാർത്ഥികൾക്കും രക്ഷിതാക്കൾക്കും വിശദമായ വിവരങ്ങൾ നൽകുകയുണ്ടായി.
വിദ്യാർത്ഥികളുടെ ഭാവി വിദ്യാഭ്യാസ പുരോഗതിക്ക് പ്രചോദനമാകുന്ന തരത്തിൽ സംഘടിപ്പിച്ച പരിപാടി അംഗങ്ങളുടെ മികച്ച പങ്കാളിത്തം കൊണ്ട് ശ്രദ്ധേയമായി.ചടങ്ങിൽ കളിമുറ്റംഭാരവാഹികൾ,അംഗങ്ങൾ,രക്ഷിതാക്കൾ, വിദ്യാർത്ഥികൾ എന്നിവർ പങ്കെടുത്തു.
