തിരുവനന്തപുരം ശ്രീ പത്മനാഭസ്വാമി ക്ഷേത്രത്തിലെ അമൂല്യവസ്തുക്കള് നഷ്ടമായെന്ന പൊലീസ് റിപ്പോര്ട്ട് തള്ളി ഭരണസമിതി. വിലപിടിപ്പുള്ളതൊന്നും നഷ്ടമായിട്ടില്ലെന്നും നേരിട്ട് പരിശോധിച്ചെന്നും ഭരണസമിതി വ്യക്തമാക്കി. പൊലീസ് റിപ്പോര്ട്ടിനെതിരെ സര്ക്കാരിന് കത്ത് നല്കും.
അമൂല്യവസ്തുക്കള് മോഷണം പോയ സംഭവത്തില് ദുരൂഹത തുടരുന്നതിനിടെയാണ് ക്ഷേത്ര ഭരണസമിതി അടിയന്തര യോഗം ചേര്ന്നത്. സംഭവത്തില് സുരക്ഷാ വീഴ്ച ഉണ്ടായെന്ന് പൊലീസ് റിപ്പോര്ട്ടിന് പിന്നാലെയാണ് യോഗം ചേര്ന്നത്. കവടിയാര് കൊട്ടാരത്തിലെ മോഷണവുമായി ഇതിന് ബന്ധമുണ്ടോയെന്നും പൊലീസ് പരിശോധിക്കുന്നുണ്ട്. കള്ളന് കപ്പലില് തന്നെയാണോ എന്ന് അന്വേഷിക്കുമെന്ന് ദേവസ്വം വകുപ്പ് മന്ത്രി കെ മുരളീധരനും കഴിഞ്ഞ ദിവസം പറഞ്ഞിരുന്നു.
ശബരിമലയ്ക്ക് പിന്നാലെ പത്മനാഭസ്വാമി ക്ഷേത്രത്തിലെ അമൂല്യവസ്തുക്കളുടെ മോഷണം ഏറെ ചര്ച്ചയാവുകയാണ്. കോടികള് വിലമതിക്കുന്ന അമൂല്യമായ വസ്തുക്കളാണ് കാണാതായിരിക്കുന്നത്. സ്വര്ണ വിളക്ക് അറ്റകുറ്റ പണികള്ക്കായി മാറ്റിയെങ്കിലും പിന്നീട് കാണാതാവുകയായിരുന്നു. പകരം ഔദ്യോഗിക രേഖകളില്ലാതെ വെള്ളി വിളക്ക് സ്ഥാപിച്ചു. കൂടാതെ, ക്ഷേത്രത്തിലെ പ്രധാനപ്പെട്ട വൈരനമ എന്ന ആഭരണം ആറ് മാസമായി കാണാനില്ലെന്നാണ് റിപ്പോര്ട്ടില് വിശദീകരിക്കുന്നത്.
എന്നാല്, ക്ഷേത്രത്തില് മോഷണം ഉണ്ടായിട്ടില്ലെന്നായിരുന്നു ക്ഷേത്ര ഭരണ സമിതിയുടെ ആദ്യ പ്രതികരണം. ഇതിനു പിന്നാലെ ആഭ്യന്തര മന്ത്രി രമേശ് ചെന്നിത്തലയും, ദേവസ്വം മന്ത്രി കെ മുരളീധരനും ഭരണാസമിതിയോട് വിവരങ്ങള് തേടിയിരുന്നു. തുടര്ന്നാണ് ഇന്ന് ഭരണാസമിതിയുടെ അടിയന്തര യോഗം ചേര്ന്നത്.
ക്ഷേത്രത്തിലെ നിലവറയ്ക്ക് പുറത്തുള്ള സ്വര്ണവും വെള്ളിയും സ്ട്രോങ് റൂമിലേക്ക് എത്രയും വേഗം മാറ്റണമെന്നും ഡിജിപി നിര്ദേശിച്ചിരുന്നു, ഇക്കാര്യങ്ങള് ചര്ച്ച ചെയ്യാനായിരുന്നു ഇന്നത്തെ യോഗം. കൂടാതെ, വിശ്വാസികള് സംഭാവനായായി നല്കുന്ന മുഴുവന് വസ്തുക്കളും ലോക്കറിലേക്ക് മാറ്റി പൊലീസ് കാവല് ഏര്പ്പെടുത്തണമെന്നും സൂക്ഷ്മ പരിശോധന കൂടാതെ ഒരാളെ പോലും ക്ഷേത്രത്തിലേക്ക് പ്രവേശിപ്പിക്കരുതെന്നും ഡിജിപി നിര്ദേശം നല്കി.
ക്ഷേത്രത്തിലെ ചില ജീവനക്കാരും സുരക്ഷാ ഉദ്യോഗസ്ഥരും രാജകുടുംബവുമായി അടുപ്പമുള്ളവരും സുരക്ഷാ പരിശോധനകള് ഒഴിവാക്കി മറ്റൊരു പ്രവേശന കവാടമായ ചെമ്പകത്തുമൂടിലൂടെയാണ് ക്ഷേത്രത്തിലേക്ക് കടക്കുന്നതെന്നും റിപ്പോര്ട്ടില് വ്യക്തമാക്കിയിട്ടുണ്ട്. ആദിത്യവര്മയുമായി ബന്ധമുള്ള ചില വ്യക്തികള് സുരക്ഷാ ക്രമീകരണം മറികടന്ന് ക്ഷേത്രത്തില് കയറുന്നത്. സ്ഥിരമായി ചെമ്പകത്തുമൂട് പ്രവേശന കവാടത്തിലൂടെ കടക്കുന്നവരുടെ പേരുകളടക്കം റിപ്പോര്ട്ടില് നല്കിയിട്ടുണ്ട്.
