ചങ്ങരംകുളം: നന്നംമുക്ക് ഗ്രാമ പഞ്ചായത്ത് ഭരണ സമതി ചങ്ങരംകുളം മേഖലയിൽ പ്രവർത്തിക്കുന്ന പത്ര, ദൃശ്യ, ഓൺലൈൻ മാധ്യമ പ്രവർത്തകരുമായി കൂടി കാഴ്ച നടത്തി. പ്രാദേശിക ഭരണ കൂടങ്ങളുടെ നേട്ടങ്ങളും, കോട്ടങ്ങളും ചൂണ്ടി കാണിക്കുന്നതിൽ ഏറ്റവും വലിയ പങ്ക് വഹിക്കുന്നവരാണ് പ്രാദേശിക മാധ്യമ പ്രവർത്തകരെന്ന് നന്നംമുക്ക് ഗ്രാമ പഞ്ചായത്ത് പ്രസിഡന്റ് ശാന്തിനി രവീന്ദ്രൻ പറഞ്ഞു.
എല്ലാ വാർഡികുളിലും നടക്കുന്ന വികസന പ്രവർത്തനങ്ങൾ കൃത്യമായി ജനങ്ങളിലേക്ക് എത്തിക്കാൻ മാധ്യമ പ്രവർത്തകരുടെ സഹായം വേണമെന്നും,വികസന പ്രവർത്തനത്തിലോ, മറ്റു പ്രവർത്തനങ്ങളിലോ ജനങ്ങളുടെ പരാതികൾ ഉണ്ടെങ്കിൽ പഞ്ചായത്ത് ഭരണ സമതിയുടെ ശ്രദ്ധയിൽ കൊണ്ട് വരണമെന്നും പ്രസിഡന്റ് ചൂണ്ടി കാട്ടി.മഴക്കാല ശുചീകരണ പ്രവർത്തനങ്ങൾ പഞ്ചായത്തിന്റെ ഭാഗത്ത് നിന്നും നടന്നു വരുന്നുണ്ടെങ്കിലും പല ഭാഗങ്ങളിൽ ശുചീകരണപ്രവർത്തനങ്ങൾ അടിയന്തരമായി നടത്തേണ്ടതുണ്ടെന്ന് മാധ്യമ പ്രവർത്തകർ ചൂണ്ടി കാട്ടി.പഞ്ചായത്ത് കോൺഫ്രൻസ് ഹാളിൽ നടന്ന പരിപാടി പഞ്ചായത്ത് വൈസ് പ്രസിഡന്റ് മുഹമ്മദലി നരണിപ്പുഴ അധ്യക്ഷത വഹിച്ചു.
പഞ്ചായത്ത് പ്രസിഡന്റ് ശാന്തിനി രവീന്ദ്രൻ ഉദ്ഘാടനം നിർവഹിച്ചു. പഞ്ചായത്ത് അസിസ്റ്റന്റ് സെക്രട്ടറി മനോജ്‌, പ്രസ്സ് ക്ലബ് പ്രസിഡന്റ് റാഷിദ് നെച്ചിക്കൽ എന്നിവർ സംസാരിച്ചു.ആരോഗ്യ വിദ്യാഭ്യാസ സ്റ്റാന്റിങ് കമ്മിറ്റി ചെയർമാൻ മുസ്തഫ ചാലുപറമ്പിൽ സ്വാഗതവും, പഞ്ചായത്ത് മെമ്പർ പരമേശ്വരൻ നന്ദിയും പറഞ്ഞു. ജനപ്രതിനിധികളും മാധ്യമ പ്രവർത്തകരും സംഗമത്തിൽ പങ്കെടുത്തു. ചങ്ങരംകുളം പ്രസ്സ് ക്ലബ്ബിനുള്ള ഉപഹാരം പഞ്ചായത്ത് പ്രസിഡന്റിൽ നിന്നും പ്രസ്സ് ക്ലബ് റാഷിദ് നെച്ചിക്കൽ ഏറ്റുവാങ്ങി.
