നിയമസഭാ തിരഞ്ഞെടുപ്പ് പൂർണ്ണമായും നിരീക്ഷിക്കാൻ വിപുലമായ സജ്ജീകരണങ്ങളുമായി ജില്ലാ ഭരണകൂടം.വോട്ടെടുപ്പ് പ്രക്രിയ സുതാര്യവും സുഗമവുമാണെന്ന് ഉറപ്പാക്കാൻ ജില്ലാ ആസൂത്രണ സമിതി ഹാളിൽ അത്യാധുനിക കൺട്രോൾ റൂം പ്രവർത്തനമാരംഭിച്ചു.ജില്ലയിലെ ഓരോ പോളിംഗ് ബൂത്തിലെയും ചലനങ്ങൾ തത്സമയം കൺട്രോൾ റൂമിൽ ലഭ്യമാകും.
വെബ്കാസ്റ്റിംഗും തത്സമയ നിരീക്ഷണവും,3,689 ബൂത്തുകളിലും നിരീക്ഷണം:ജില്ലയിലെ മുഴുവൻ പോളിംഗ് സ്റ്റേഷനുകളിലും വെബ്കാസ്റ്റിംഗ് സംവിധാനം ഏർപ്പെടുത്തിയിട്ടുണ്ട്.ബൂത്തിനകത്തെയും പുറത്തെയും ദൃശ്യങ്ങൾ കൺട്രോൾ റൂമിലിരുന്ന് ഉദ്യോഗസ്ഥർക്ക് നിരീക്ഷിക്കാം.വോട്ടിംഗ് ശതമാനം, മോക്ക് പോളിംഗ്, വോട്ടെടുപ്പ് ആരംഭിക്കൽ തുടങ്ങിയ വിവരങ്ങൾ ഓരോ രണ്ട് മണിക്കൂർ ഇടവിട്ട് പി.ആർ.ഒ നെറ്റ് ആപ്പ് (PRO NET App)വഴി ശേഖരിക്കും.രാവിലെ 9 മണിക്ക് ആദ്യഘട്ട വോട്ടിംഗ് ശതമാനം പുറത്തുവിടും.കൺട്രോൾ റൂമിൽ 64 പേർ വെബ്കാസ്റ്റിംഗ് നിരീക്ഷണത്തിനുണ്ടാകും. കൂടാതെ കെ.എസ്.ഇ.ബി, പോലീസ്,ഫയർഫോഴ്സ്, മോട്ടോർ വെഹിക്കിൾ,ഹെൽത്ത് തുടങ്ങിയ വിവിധ വകുപ്പുകളിലെ 25 ഓളം ഉദ്യോഗസ്ഥരും കർമ്മനിരതരാകും.
അനിഷ്ട സംഭവങ്ങൾ, വോട്ടിംഗ് യന്ത്രങ്ങളിലെ തകരാറുകൾ,വോട്ടെടുപ്പ് വൈകൽ തുടങ്ങിയ സാഹചര്യങ്ങൾ ഉണ്ടായാൽ ഉടനടി ഇടപെട്ട് പരിഹരിക്കാൻ ഈ സംവിധാനത്തിലൂടെ സാധിക്കും.
