പെരുമുക്ക് എ.എം.എൽ.പി സ്കൂളിന്റെ 96-ാമത് വാർഷികാഘോഷം പ്രൗഢഗംഭീരമായി നടന്നു

ചങ്ങരംകുളം:പാരമ്പര്യത്തിന്റെയും മികവിന്റെയും 96 വർഷങ്ങൾ പിന്നിടുന്ന പെരുമുക്ക് എ.എം.എൽ.പി സ്കൂളിന്റെ വാർഷികാഘോഷം വൈവിധ്യമാർന്ന പരിപാടികളോടെ സംഘടിപ്പിച്ചു. സ്കൂൾ അങ്കണത്തിൽ നടന്ന ചടങ്ങിൽ മാനേജർ പി.വി. അബ്ദുൽ ലത്തീഫ് പതാക ഉയർത്തിയതോടെ ആഘോഷങ്ങൾക്ക് തുടക്കമായി.പ്രശസ്ത എഴുത്തുകാരൻ താഹിർ ഇസ്മായിൽ വാർഷികാഘോഷ പരിപാടികൾ ഉദ്ഘാടനം ചെയ്തു.വിദ്യാലയങ്ങൾ വെറും അറിവ് പകർന്നുനൽകുന്ന ഇടങ്ങളല്ല, മറിച്ച് തലമുറകളെ സംസ്‌കരിച്ചെടുക്കുന്ന കേന്ദ്രങ്ങളാണെന്ന് അദ്ദേഹം തന്റെ പ്രസംഗത്തിൽ ഓർമ്മിപ്പിച്ചു. പി.ടി.എ. പ്രസിഡന്റ് വി.വി. കരുണാകരൻ ചടങ്ങിൽ അധ്യക്ഷത വഹിച്ചു.ചടങ്ങിൽ എടപ്പാൾ എ.ഇ.ഒ. രമ വി.വി.മുഖ്യാതിഥിയായിരുന്നു.വിദ്യാലയത്തിന്റെ ഒരു വർഷത്തെ പ്രവർത്തനങ്ങൾ ക്രോഡീകരിച്ചുകൊണ്ടുള്ള വാർഷിക സപ്ലിമെന്റ് ചടങ്ങിൽ പ്രകാശനം ചെയ്തു.എൽ.എസ്.എസ്. (LSS) പരീക്ഷയിൽ ഉന്നതവിജയം കരസ്ഥമാക്കിയ വിദ്യാർത്ഥികളെ ചടങ്ങിൽ അനുമോദിച്ചു.വിദ്യാലയത്തിലെ മികച്ച വിദ്യാർത്ഥിക്കുള്ള പ്രത്യേക പുരസ്‌കാരവും വിതരണം ചെയ്തു.സ്കൂളിന്റെ വാർഷിക പ്രവർത്തന റിപ്പോർട്ട് പ്രധാനധ്യാപിക ശാരി എ. അവതരിപ്പിച്ചു.ചങ്ങരംകുളം പ്രസ് ക്ലബ് പ്രസിഡന്റ് റാഷിദ് നെച്ചിക്കൽ, ഹാരിസ് കെ.വി.ഇബ്രാഹിം സി.വി.രാജീവ്,മുഹമ്മദ് ഷാഫി,കെ.വി.ഉസ്മാൻ പന്താവൂർ ,ഫാത്തിമത്ത് സുഹ്‌റ എന്നിവർ പരിപാടിക്ക് ആശംസകൾ നേർന്നു.വിരമിച്ച അധ്യാപകരായ റസിയ ടീച്ചർ, വിജയലക്ഷ്മി, ഏലിയാമ്മ, സിൽവി സ്‌കറിയ, മുഹമ്മദ് ബഷീർ എന്നിവരും മുൻ വിദ്യാർത്ഥികളായ കെ.വി. ഷെക്കീർ, മുആഫ്, ദുബായ് ഒരുമ പ്രതിനിധി കെ.വി. ആബിദ് പെരുമുക്ക്, ഖത്തർ ഒരുമ പ്രതിനിധി രഞ്ജിത് എ.വി.ഫൈസൽ വി.പി. തുടങ്ങിയവരും ചടങ്ങിൽ സംബന്ധിച്ചു.എബിൻ തങ്കച്ചൻ ബി.പരിപാടിക്ക് നന്ദി രേഖപ്പെടുത്തി.വിദ്യാർത്ഥികളുടെ കലാപരിപാടികളോടെ ആഘോഷങ്ങൾ സമാപിച്ചു.