ബൈക്കിൽ നിന്ന് റോഡിലേക്ക് തെറിച്ചുവീണ 12കാരൻ ബസ് കയറി മരിച്ചു; അപകടം അച്ഛനൊപ്പം യാത്ര ചെയ്യവെ

ആലപ്പുഴ: വാഹനാപകടത്തിൽ 12 വയസുകാരന് ദാരുണാന്ത്യം. ആലപ്പുഴ തുറവൂരിലാണ് സംഭവം. വയലാർ കൊല്ലപ്പള്ളി പള്ളിപ്പാട്ട് നിഷാദിന്റെ മകൻ ശബരീശൻ അയ്യൻ ആണ് മരിച്ചത്. ഇന്ന് രാവിലെ എട്ടരയോടെ ദേശീയപാതയിൽ പത്മാക്ഷികവലയ്‌ക്ക് സമീപമാണ് അപകടമുണ്ടായത്.അച്ഛന്റെ ബൈക്കിന്റെ പിൻസീറ്റിലിരിക്കുകയായിരുന്നു ശബരീശനും സഹോദരനും. ഇതിനിടെ സ്വകാര്യ ബസ് ബൈക്കിൽ ഇടിക്കുകയായിരുന്നു. തുടർന്ന് ബൈക്കിന്റെ നിയന്ത്രണം വിട്ട് പിൻസീറ്റിലിരുന്ന ശബരീശൻ അയ്യൻ സ്വകാര്യ ബസിനടിയിലേക്ക് തെറിച്ചുവീഴുകയായിരുന്നു. ബസിന്റെ പിൻചക്രം കയറിയിറങ്ങിയതിനാൽ ശബരീശൻ തൽക്ഷണം മരിച്ചു. പരിക്കേറ്റ നിഷാദും ഇളയ മകനും തുറവൂർ സർക്കാർ ആശുപത്രിയിൽ ചികിത്സയിലാണ്