മെഡിക്കൽ കോളേജിൽ കെട്ടിടം തകർന്നുവീണ് മരണമടഞ്ഞ ബിന്ദുവിന്റെ മകൻ ജോലിയിൽ പ്രവേശിച്ചു

കോട്ടയം: മെഡിക്കൽ കോളേജിൽ കെട്ടിടം തകർന്നുവീണ് മരണമടഞ്ഞ ബിന്ദുവിന്റെ മകൻ നവനീത് ജോലിയിൽ പ്രവേശിച്ചു. കോട്ടയം ഡിവിഷൻ ദേവസ്വം ബോർഡിലാണ് ജോലി. മന്ത്രി വി എൻ വാസവന്റെ സാന്നിദ്ധ്യത്തിലാണ് ജോലിയിൽ പ്രവേശനം നേടിയത്.എൻജിനിയറിംഗ് ബിരുദധാരിയായ നവനീതിന് ദേവസ്വം ബോർഡ് മരാമത്ത് വിഭാഗത്തിൽ തേർഡ് ഗ്രേഡ് ഓവർസിയർ തസ്തികയിലാണ് നിയമനം നൽകിയതെന്ന് മന്ത്രി വി എൻ വാസവൻ നേരത്തെ അറിയിച്ചിരുന്നു. കുടുംബത്തിന് സർക്കാർ നവീകരിച്ചു നൽകിയ വീടിന്റെ താക്കോൽ നേരത്തേ കൈമാറിയിരുന്നു.
കഴിഞ്ഞ ജൂലായിലായിരുന്നു കോട്ടയം മെഡിക്കൽ കോളേജ് ആശുപത്രിയിലെ പഴയ പതിനാലാം വാർഡ് പൊളിഞ്ഞുവീണത്. കെട്ടിടത്തിനുള്ളിൽപ്പെട്ട തലയോലപ്പറമ്പ് സ്വദേശിനി ബിന്ദുവിനെ രക്ഷിക്കാനായില്ല. മകളുടെ ചികിത്സയുമായി ബന്ധപ്പെട്ടാണ് ബിന്ദു കോട്ടയം മെഡിക്കൽ കോളേജിലെത്തിയത്.