തിരുവനന്താപുരം : എയർ ഇന്ത്യ എക്‌ സ്പ്രസ് യു എ ഇയില്‍ നിന്ന് ഇന്ത്യയിലേക്കുള്ള ടിക്കറ്റ് നിരക്ക് കുറച്ചു. 180 ദിർഹം മുതലാണ് നിരക്ക്.
പരിമിത കാലയളവിലേക്കുള്ള “പേഡേ സെയില്‍’ ആണ് ആരംഭിച്ചത്. സെപ്തംബർ ഒന്ന് വരെ ബുക്കിംഗ് നടത്താം. ഈ പ്രമോഷൻ, 2026 മാർച്ച്‌ 31 വരെയുള്ള യാത്രകള്‍ക്കാണ്. “തിരക്കേറിയ യു എ ഇ – ഇന്ത്യ യാത്രാ ഇടനാഴിയില്‍ ഇത്തരമൊരു നിരക്ക് അപൂർവമാണ്.’ ചെക്ക് – ഇൻ ബാഗേജ് ഇല്ലാത്ത ടിക്കറ്റ് വാഗ്ദാനം ചെയ്യുന്ന എയർലൈനിന്റെ “എക്‌സ്പ്രസ് ലൈറ്റ്’ വിഭാഗത്തിനാണ് 180 ദിർഹം നിരക്ക്.
ചെക്ക് – ഇൻ ബാഗേജ് ഉള്‍പ്പെടുന്ന “എക്‌സ്പ്രസ് വാല്യു’ നിരക്ക് അന്താരാഷ്ട്ര റൂട്ടുകള്‍ക്ക് 200 ദിർഹം മുതല്‍ ആരംഭിക്കുന്നു. തിരഞ്ഞെടുത്ത നിരവധി ലക്ഷ്യസ്ഥാനങ്ങള്‍ക്ക് 149 ദിർഹം മുതല്‍ ആരംഭിക്കുന്ന വണ്‍വേ നിരക്കുകള്‍ അടുത്തിടെ എയർ അറേബ്യ പ്രഖ്യാപിച്ചിരുന്നു. സമാനമായ ഫ്ലാഷ് സെയിലിന് പിന്നാലെയാണ് എയർ ഇന്ത്യ എക്‌സ്പ്രസിന്റെ പുതിയ ഓഫർ വരുന്നത്. ഇന്ത്യയിലെ ആഭ്യന്തര റൂട്ടുകളില്‍, ലോഗിൻ ചെയ്ത അംഗങ്ങള്‍ക്ക് എക്‌സ്പ്രസ് ലൈറ്റ് സ്‌പെഷ്യല്‍ നിരക്കുകള്‍ ഏകദേശം 54 ദിർഹം മുതല്‍ ആരംഭിക്കുന്നു. എക്‌സ്പ്രസ് വാല്യു നിരക്കുകള്‍ 56 ദിർഹം മുതല്‍ ലഭ്യമാണ്.
മൊബൈല്‍ ആപ്പ് വഴി നടത്തുന്ന ബുക്കിംഗുകള്‍ക്ക് സീറോ കണ്‍വീനിയൻസ് ഫീസ് ഉള്‍പ്പെടെ നിരവധി ആഡ് ഓണുകളും എയർലൈൻ വാഗ്ദാനം ചെയ്യുന്നു. ആഭ്യന്തര വിമാനങ്ങളില്‍ 15 കിലോഗ്രാമും അന്താരാഷ്ട്ര വിമാനങ്ങളില്‍ 20 കിലോഗ്രാമും കൊണ്ടുപോകാം.
