രാജ്യത്തെ ആദ്യ ഹൈഡ്രജൻ ട്രക്ക് നിരത്തിലിറക്കി അദാനി ഗ്രൂപ്പ്. 40 ടൺ ഭാരം വഹിക്കാൻ കഴിയുന്ന ട്രക്ക് ഛത്തിസ്ഗഡ് മുഖ്യമന്ത്രിയാണ് ഫ്ലാഗ് ഓഫ് ചെയ്തത്. ഗാരെ പെൽമ III ബ്ലോക്കിൽ നിന്ന് കൽക്കരി കൊണ്ടുപോകുന്നതിനാണ് ട്രക്ക് ഉപയോഗിക്കുക. ഒറ്റയടിക്ക് 200 കിലോമീറ്റർ ദൂരം വരെ സഞ്ചരിക്കാൻ കഴിയും. മൂന്ന് ഹൈഡ്രജൻ ടാങ്കുകൾ കൊണ്ട് സജ്ജീകരിച്ചിരിക്കുന്ന ഈ ട്രക്ക് രൂപകൽപ്പന ചെയ്തിരിക്കുന്നത്.ഹൈഡ്രജന്‍ ട്രക്ക് വലിയ അളവില്‍ കാർബണ്‍ പുറന്തള്ളല്‍ കുറയ്ക്കുമെന്നും കമ്പനി അവകാശപ്പെടുന്നു. ജലബാഷ്പവും ചൂടുള്ള വായുവും മാത്രമേ ഇവ ഉത്പാദിപ്പിക്കുകയുള്ളു. നിലവില്‍ ഉപയോഗിക്കുന്ന ഡീസല്‍ ട്രക്കുകള്‍ക്ക് പകരമായി കൂടുതല്‍ ഹൈഡ്രജന്‍ ട്രക്കുകള്‍ ഭാവിയില്‍ ഉപയോഗിക്കുമെന്ന് അദാനി ഗ്രൂപ്പ് പറയുന്നു.
ഛത്തീസ്ഗഢ് സ്റ്റേറ്റ് പവർ ജനറേഷൻ കമ്പനി ലിമിറ്റഡിന്റെ ഒരു വലിയ സംരംഭത്തിന്റെ ഭാഗമാണ് ഈ പദ്ധതി. അദാനി എന്റർപ്രൈസസിന്റെ അനുബന്ധ സ്ഥാപനങ്ങളായ അദാനി ന്യൂ ഇൻഡസ്ട്രീസ് ലിമിറ്റഡുമായി (ANIL) സഹകരിച്ച് അദാനി നാച്ചുറൽ റിസോഴ്‌സസ് (ANR) ആണ് ഈ സംരംഭത്തിന് നേതൃത്വം നൽകുന്നത്. ഗ്രീൻ ഹൈഡ്രജൻ, സോളാർ മൊഡ്യൂളുകൾ, വിൻഡ് ടർബൈനുകൾ, ബാറ്ററി നിർമ്മാണം എന്നിവയിലും ഏർപ്പെട്ടിരിക്കുന്ന ANIL-ൽ നിന്നാണ് ANR ഹൈഡ്രജൻ ഇന്ധന സെല്ലുകൾ ലഭ്യമാക്കുന്നത്.
ഹൈഡ്രജൻ ഉപയോഗിച്ച് പ്രവർത്തിക്കുന്ന ട്രക്കുകൾക്കായുള്ള ഈ സംരംഭം അദാനി ഗ്രൂപ്പിന്റെ ഡീകാർബണൈസേഷനും ഉത്തരവാദിത്തമുള്ള ഖനനത്തിനുമുള്ള പ്രതിബദ്ധതയിലേക്കുള്ള ഒരു സുപ്രധാന ചുവടുവയ്പ്പാണെന്ന് അദാനി എന്റർപ്രൈസസിന്റെ നാച്ചുറൽ റിസോഴ്‌സസ് സിഇഒയും ഡയറക്ടറുമായ വിനയ് പ്രകാശ് പറഞ്ഞു. “സുസ്ഥിര ഖനന രീതികളിൽ പുതിയ മാനദണ്ഡങ്ങൾക്ക് വഴിയൊരുക്കുമ്പോൾ എല്ലാവർക്കും താങ്ങാനാവുന്നതും വിശ്വസനീയവുമായ വൈദ്യുതി ഉറപ്പാക്കുകയാണ് ഞങ്ങളുടെ ലക്ഷ്യം” എന്ന് അദ്ദേഹം കൂട്ടിച്ചേർത്തു.
