നവയുഗ പൂരാഘോഷ കമ്മിറ്റിക്ക് ഇത്തവണ ആനയില്ല ‘അതുലിന്റെ വീട് നിര്‍മാണം പൂര്‍ത്തിയാക്കും

ചാലിശ്ശേരി:സഹപ്രവര്‍ത്തകന്റെ അപ്രതീക്ഷിത വേര്‍പ്പാടിനെ തുടര്‍ന്ന് പ്രശസ്ഥമായ ചാലിശ്ശേരി മുലയംപറമ്പ് ക്ഷേത്രോത്സവത്തിന് ആലിക്കര നവയുഗ പൂരാഘോഷ കമ്മിറ്റി ഇത്തവണ ആനയെ എഴുന്നള്ളിക്കുന്നത് മാറ്റി വച്ചു.5 ലക്ഷത്തിലതികം രൂപക്ക് ബുക്ക് ചെയ്ത ചിറക്കല്‍ കാളിദാസന്‍ എന്ന കൊമ്പനെയാണ് പ്രിയ സുഹൃത്തിന്റെ അപ്രതീക്ഷ വേര്‍പ്പാടിനെ തുടര്‍ന്ന് നവയുഗ പൂരാഘോഷ കമ്മിറ്റി ക്യാന്‍സല്‍ ചെയ്തത്.പകരം പണി പൂര്‍ത്തിയാവാത്ത അതുലിന്റെ വീടിന്റെ നിര്‍മാണ പ്രവൃത്തി പൂര്‍ത്തീകരിച്ച് നല്‍കാനാണ് സഹപ്രവര്‍ത്തകരുടെ തീരുമാനം.സെപ്റ്റംബര്‍ 26 പെരുമ്പിലാവ് പുഞ്ചിരിക്കാവിലുണ്ടായ ബൈക്ക് അപകടത്തിലാണ് ആലിക്കര സ്വദേശിയായ 17 വയസുള്ള അതുലിന്റെ ജീവന്‍ നഷ്ടമായത്.കൂടെയുണ്ടായിരുന്ന സുഹൃത്തിന് അപകടത്തില്‍ ഗുരുതരമായി പരിക്കേല്‍ക്കുകയും ചെയ്തിരുന്നു.അതുല്‍ മരണപ്പെടുന്നതിന്റെ രണ്ട് മാസം മുമ്പാണ് അതുലിന്റെ പിതാവ് അജിതന്‍ അസുഖത്തെ തുടര്‍ന്ന് അപ്രതീക്ഷിതമായി വിടവാങ്ങിയത്.അമ്മയും സഹോദരിയും അടങ്ങുന്ന കുടുംബത്തിന്റെ ഏക പ്രതീക്ഷയായിരുന്ന അതുലിന്റെ മരണം സാമ്പത്തികമായ ഏറെ പിന്നോക്കം നില്‍ക്കുന്ന കുടുംബത്തെ തളര്‍ത്തിയിരുന്നു.കഴിഞ്ഞ 15 വര്‍ഷമായി ചാലിശ്ശേരി പൂരത്തിന് നവയുഗ കമ്മിറ്റി പൂരം കൊണ്ട് വരുന്നുണ്ട്.ഈ കമ്മിറ്റിയിലെ അംഗം കൂടിയായിരുന്നു അതുല്‍.നവയുഗ കമ്മിറ്റിയുടെ ഈ തീരുമാനത്തിന് നാട്ടിലും സോഷ്യല്‍ മീഡിയയിലും വലിയ സ്വീകാര്യതയാണ് ലഭിച്ചത്.