പൊന്നാനി:വ്യാജ ചെക്ക് തട്ടിപ്പ് കേസിൽ പ്രതി പൊന്നാനി പോലീസിന്റെ പിടിയിൽ.ഹാർഡ് വെയർ സ്ഥാപനങ്ങളിലും ഒ.എൽ.എക്സ് വഴിയും വ്യാജ ചെക്ക് നൽകി തട്ടിപ്പ് നടത്തിയ നിരവധി കേസുകളിലെ പ്രതി കൊല്ലം കാരറ മടത്തറ സ്വദേശി പറയാട്ട് ഹൗസിൽ അഖിലിനെയാണ്(38)പൊന്നാനി പൊലീസ് അറസ്റ്റ് ചെയ്തത്.
പൊന്നാനി ചമ്രവട്ടം ജങ്ഷനിൽ സിൽസില ഹാർഡ് വെയർ ഷോപ്പിലെത്തി സൈറ്റ് എൻജിനീയറാണെന്ന് പരിചയപ്പെടുത്തി വാട്ടർ പ്രൂഫ് പെയിന്റ് വാങ്ങിയ ശേഷം പണത്തിനുപകരം വ്യാജ ചെക്ക് നൽകി സ്ഥലം വിട്ടിരുന്നു.വാങ്ങിയ സാധനങ്ങൾ വെളിയങ്കോട്ടെ മറ്റൊരു പെയിൻ്റ് കടയിൽ വിൽക്കാൻ എത്തിയപ്പോൾ കടയുടമ പൊലീസിൽ വിവരം അറിയിച്ചതിനെത്തുടർന്നാണ് പൊന്നാനി പൊലീസ് എത്തി പ്രതിയെ പിടി കൂടിയത്.
ഒ.എ ൽ.എക്സ് വഴി ഇടപാടുകാരിൽ നിന്ന് മൊബൈൽ ഫോണും വാഹനങ്ങളും വാങ്ങി പണമില്ലാത്ത അക്കൗണ്ടിന്റെ ചെക്ക് നൽകി വഞ്ചന നടത്തിയ കേസും പ്രതിക്കെതിരെയുണ്ടെന്ന് പൊലീസ് പറഞ്ഞു.കേരളത്തിലെ വിവിധ ജില്ലകളിൽ നിരവധി ഷോപ്പുകളിൽ ഇയാൾ സമാനമായ തട്ടിപ്പ് നടത്തിയതായി പൊലീസിന് വിവരം ലഭിച്ചിട്ടുണ്ട്.
