സണ്ണി ജോസഫും സന്ദീപ് വാര്യരും കെ സി വേണുഗോപാലിനൊപ്പം; കോൺഗ്രസിലെ ‘മുഖ്യമന്ത്രി കണക്കെടുപ്പിന്റെ’ ചിത്രം പുറത്ത്

കോൺഗ്രസിലെ മുഖ്യമന്ത്രി ചർച്ചകൾ തകൃതിയായി നടക്കുകയാണ്. എഐസിസി നിരീക്ഷകരായ മുഗൾ വാസ്നിക്കും അജയ് മാക്കനും ഇന്ന് എഐസിസി നേതൃത്വത്തിന് കേരളത്തിലെ ചർച്ചകളുടെ റിപ്പോർട്ട് കൈമാറും എന്നാണ് സൂചന. ഇതിനിടെ എംഎൽഎമാരുടെ പിന്തുണ ആർക്കൊക്കെയാണെന്നുള്ളതിന്റെ കണക്കുകളുടെ ചിത്രം പുറത്ത്. കെപിസിസി ആസ്ഥാനത്തിന് മുന്നിൽ നിന്നുള്ള ചിത്രമാണ് പുറത്തുവന്നത്. മുകുൾ വാസനിക്കിന്റെ കൈയിലെ പട്ടികയിലുള്ള കണക്കുകൾ വച്ച് കെ പി സി സി അധ്യക്ഷൻ സണ്ണി ജോസഫിന്റെ പിന്തുണ കെ സി വേണുഗോപാലിനാണ്. കൂടാതെ സന്ദീപ് വാര്യയർ, ടി സിദ്ധിഖ്, സജീവ് ജോസഫ്, ഉഷ വിജയൻ, ടി ഓ മോഹനൻ എന്നിവരുടെ പിന്തുണയും കെ സി വേണുഗോപാലിനാണ്. ഐ സി ബാലകൃഷ്ണൻ കെ സി വേണുഗോപാലിനെയും രമേശ് ചെന്നിത്തലയേയും പിന്തുണയ്‌ക്കുന്നുണ്ട്‌.അതേസമയം മുഖ്യമന്ത്രിയെ തീരുമാനിക്കുന്നത് ഫ്ളക്സിന്റെ വലിപ്പം നോക്കിയില്ലെന്ന്‌ ആണ് രാവിലെ കെ മുരളീധരൻ പ്രതികരിച്ചത്. നാളെ കേരളത്തിലെ നേതാക്കളുമായി രാഹുൽ ഗാന്ധി അടക്കമുള്ള നേതാക്കൾ കൂടിക്കാഴ്ച നടത്തും. ഇതിനുശേഷമാകും ഹൈക്കമാൻഡ് മുഖ്യമന്ത്രിയെ പ്രഖ്യാപിക്കുക. വി ഡി സതീശൻ മുഖ്യമന്ത്രി ആകണമെന്ന് പിടിവാശിയിലാണ് മുസ്ലിം ലീഗ് നേതൃത്വം. ലീഗിനെ കൂടാതെ മറ്റു പ്രധാന ഘടകകക്ഷികളും ഈ ആവശ്യം എഐസിസി നിരീക്ഷകരെ അറിയിച്ചിട്ടുണ്ട്.