വീട്ടിലെ ഊണിന്റെ മറവിൽ മദ്യ കച്ചവടം; ഹോട്ടൽ ഉടമയുടെ കൈവശമുണ്ടായിരുന്നത് 76 കുപ്പി മദ്യം

എരുമേലി: ഭക്ഷണവിൽപ്പനയുടെ മറവിൽ വലിയ അളവിൽ മദ്യം സൂക്ഷിച്ച ഹോട്ടലുടമയെ പിടികൂടി എക്‌സൈസ്. കറിക്കാട്ടൂർ സ്വദേശിയായ വി എസ് ബിജുമോനാണ് പിടിയിലായത്. തിരുവോണം എന്ന പേരിൽ ഹോട്ടൽ നടത്തുന്ന ഇയാൾ ‘വീട്ടിലെ ഊണിന്റെ’ മറവിലാണ് മദ്യം സൂക്ഷിച്ചിരുന്നത്. ബാറുകൾ അവധിയായ പുതുവർഷ ദിനത്തിൽ ഇരട്ടി ലാഭത്തിൽ വിൽക്കാനായി 76 കുപ്പി മദ്യമാണ് എക്‌സൈസ് പിടിച്ചെടുത്തത്.ബെവ്‌കോയിൽ പലതവണയായി ക്യൂ നിന്നാണ് ഇയാൾ മദ്യം വാങ്ങികൂട്ടിയത്. ഇത് അന്യസംസ്ഥാന തൊഴിലാളികൾക്കും മറ്റും ഇരട്ടിവിലയ്‌ക്കാണ് വിറ്റിരുന്നത്. വീടിന്റെ മുകളിലത്തെ നിലയിൽ രഹസ്യ അറകളിലാണ് ഇയാൾ മദ്യം സൂക്ഷിച്ചിരുന്നത്. എരുമേലി എക്‌സൈസ് ഇൻസ്‌പെക്‌ടർ കെഎച്ച് രാജിവിന്റെ നേതൃത്വത്തിൽ നടത്തിയ പരിശോധനയിലാണ് പ്രതിയെ പിടികൂടിയത്. പ്രതിയെ കാഞ്ഞിരപ്പള്ളി കോടതിയിൽ ഹാജരാക്കി.