മഞ്ഞുമ്മൽ ബോയ്സ് സാമ്പത്തിക തട്ടിപ്പ് കേസ്; നടൻ സൗബിൻ ഷാഹിറിന്റെ ഹർജി കോടതി തള്ളി; വിദേശയാത്രാ വിലക്ക് തുടരും

എറണാകുളം: മഞ്ഞുമ്മൽ ബോയ്സ് സാമ്പത്തിക തട്ടിപ്പ് കേസിൽ ജാമ്യത്തിൽ കഴിയുന്ന നടനും നിർമാതാവുമായ സൗബിൻ ഷാഹിറിന്റെ വിദേശയാത്രാനുമതി ആവശ്യം എറണാകുളം മജിസ്ട്രേറ്റ് കോടതി തള്ളി. ദുബൈയിൽ നടക്കുന്ന അവാർഡ് ഷോയിൽ പങ്കെടുക്കാൻ അനുവദിക്കണമെന്ന് ആവശ്യപ്പെട്ട് സൗബിൻ സമർപ്പിച്ച ഹരജിയാണ് കോടതി നിരസിച്ചത്. ജാമ്യ വ്യവസ്ഥകൾ പ്രകാരം വിദേശയാത്ര നടത്താൻ അനുവാദമില്ലെന്ന കോടതിയുടെ നിർദേശത്തിന്റെ അടിസ്ഥാനത്തിലാണ് ഈ തീരുമാനം. സൗബിൻ ഈ വ്യവസ്ഥ ചോദ്യം ചെയ്ത് വിചാരണ കോടതിയെ സമീപിച്ചെങ്കിലും പരാതിക്കാരനും പ്രോസിക്യൂഷനും ഈ ആവശ്യത്തെ ശക്തമായി എതിർത്തു. കേസിലെ പ്രധാന സാക്ഷികൾ വിദേശത്തുണ്ടെന്നും, സൗബിന് അവരെ സ്വാധീനിക്കാൻ സാധ്യതയുണ്ടെന്നും പരാതിക്കാരൻ വാദിച്ചു. പരാതിക്കാരന് വേണ്ടി അഡ്വ. സൈബി ജോസ് കിടങ്ങൂർ ഹാജരായി. മഞ്ഞുമ്മൽ ബോയ്സ് സിനിമയുടെ ലാഭവിഹിതം വാഗ്ദാനം ചെയ്ത് സാമ്പത്തിക തട്ടിപ്പ് നടത്തിയെന്ന പരാതിയിലാണ് മരട് പൊലിസ് സൗബിനെ പ്രതിയാക്കി കേസെടുത്തത്.