പ്രായപൂർത്തിയാകാത്ത പെൺകുട്ടിയുടെ വ്യാജ രേഖയുണ്ടാക്കി വിവാഹം
കേസിൽ വിവാഹ ദല്ലാള്‍ അറസ്റ്റില്‍
മാനന്തവാടി:പ്രായപൂർത്തിയാകാത്ത പട്ടികവർഗ വിഭാഗത്തിൽപെട്ട പെൺകുട്ടിയുടെ വ്യാജ രേഖയുണ്ടാക്കി ശൈശവ വിവാഹം നടത്തിയ കേസിൽ വിവാഹ ദല്ലാള്‍ പൊഴുതന അച്ചൂരാനം കാടംകോട്ടിൽ വീട്ടിൽ കെ.സി.സുനിൽ കുമാറിനെ (36) അറസ്റ്റു ചെയ്തു. എസ്എംഎസ് ഡിവൈഎസ്പി എം.എം.അബ്ദുൾ കരീമിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
മാതാപിതാക്കളുടെ നിയമത്തിലുള്ള അജ്ഞത മറയാക്കിയും ബന്ധുക്കൾക്ക് പണം നൽകി സ്വാധീനിച്ചും ആധാർ കാർഡിന്റെ കോപ്പിയിൽ ജനന തീയതി തിരുത്തിയും കേസിലെ ഒന്നാം പ്രതി വടകര പുതിയാപ്പ കുയ്യടിയിൽ വീട്ടിൽ കെ.സുജിത്തുമായി (40) 2024 ജനുവരിയിൽ പെൺകുട്ടിയുടെ വിവാഹം നടത്തുകയായിരുന്നു. ഇതിനായി സുജിത്തിൽ നിന്നും സുനിൽ കുമാർ ബ്രോക്കർ ഫീസായി കൂടിയ തുക കൈപ്പറ്റിയതായും കണ്ടെത്തി
ഇയാളുടെ ഫോൺ പരിശോധിച്ചതിൽ നിന്ന് പട്ടികവർഗ വിഭാഗത്തിൽപ്പെട്ട കൂടുതൽ പെൺകുട്ടികളുടെ ചിത്രങ്ങളും കണ്ടെത്തിയിട്ടുണ്ട്. ഇത്തരത്തിൽ ജില്ല കേന്ദ്രീകരിച്ച് പ്രായപൂർത്തിയാകാത്ത കുട്ടികളെ ജില്ലയ്ക്കകത്തും പുറത്തും വിവാഹവും പുനർവിവാഹവും നടത്തികൊടുക്കുന്നതിനു പിന്നിൽ പ്രവർത്തിച്ചുവരുന്ന ദല്ലാൾ സംഘത്തെക്കുറിച്ചും കൂടുതൽ അന്വേഷണം നടത്തിവരികയാണെന്ന് പൊലീസ് അറിയിച്ചു.
