29 March 2024 Friday

തമിഴ്‌നാട്ടില്‍ പെണ്‍കുട്ടിയെ പീഡിപ്പിച്ച എസ്‌ഐ അറസ്റ്റില്‍

ckmnews

 പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ എസ്‌ഐ അറസ്റ്റില്‍. മാധവാരം സ്‌റ്റേഷനിലെ എസ്‌ഐ സതീഷാണ് അറസ്റ്റിലായത്. പെണ്‍കുട്ടിയുടെ അമ്മയുടെ അറിവോടെയായിരുന്നു പീഡനം.

വനിതാ കമ്മീഷനോട് പെണ്‍കുട്ടി നടത്തിയ വെളിപ്പെടുത്തലിനെ തുടര്‍ന്നാണ് പിഡന വിവരം പുറത്തറിഞ്ഞത്. ഭര്‍ത്താവുമായി അകന്ന് സഹോദരിക്കൊപ്പമായിരുന്നു അമ്മയും 13കാരിയും താമസം. ഭര്‍ത്താവിനെതിരെ പരാതി നല്‍കാന്‍ എത്തിയപ്പോഴാണ് അമ്മ മാധവാരം സ്‌റ്റേഷനിലെ എസ്‌ഐ സതീഷുമായി സൗഹൃദത്തിലായത്. പിന്നീട് ഇവരെ കാണാനായി വീട്ടില്‍ എസ്‌ഐ സ്ഥിരം സന്ദര്‍ശകനായി. യുവതിക്കും സഹോദരിക്കും എസ്‌ഐ പണം നല്‍കിയിരുന്നു.

ഇതിനിടയിലാണ് യുവതിയുടെ പ്രായപൂര്‍ത്തിയാകാത്ത മകളെ എസ്‌ഐ പീഡിപ്പിക്കാന്‍ ശ്രമിച്ചത്. ശല്യം സഹിക്കാനാകാതെ, അകന്ന് കഴിയുകയായിരുന്ന അച്ഛന്റെ വീട്ടിലെത്തി പെണ്‍കുട്ടി കാര്യങ്ങള്‍ വെളിപ്പെടുത്തുകയായിരുന്നു. പെണ്‍കുട്ടിയുമായി അച്ഛന്‍ വനിതാ കമ്മീഷനെ സമീപിച്ചു. തുടര്‍ന്നാണ് അമ്മയുടെയും മാതൃസഹോദരിയുടെയും അറിവോടെയുള്ള പീഡനവിവരം പുറത്തറിഞ്ഞത്.