ക്ഷേത്രത്തിലെ ഭണ്ഡാരവും ഓഫിസും കുത്തിത്തുറന്നു, മോഷണശേഷം തൊണ്ടിമുതലുമായി ക്ഷേത്രമുറ്റത്ത് കിടന്നുറങ്ങി; യുവാവിന് കിട്ടിയത് എട്ടിന്റെ പണി
നിലമ്ബൂര്: നിലമ്ബൂര് മമ്മുള്ളി കുട്ടിച്ചാത്തന് കാവ് ക്ഷേത്രത്തില് മോഷണം നടത്തിയ പ്രതി അറസ്റ്റില്. വഴിക്കടവ് കമ്ബളക്കല്ല് സ്വദേശി കുന്നുമ്മല് ആബിദിനെയാണ് (35) നിലമ്ബൂര് പൊലീസ് കസ്റ്റഡിയിലെടുത്തത്. ക്ഷേത്രത്തിലെ ഭണ്ഡാരവും ഓഫിസും കുത്തിത്തുറന്ന് കവര്ച്ച നടത്തിയ ശേഷം തൊണ്ടിമുതലുമായി ആബിദ് ക്ഷേത്രമുറ്റത്ത് കിടന്നുറങ്ങിപോകുകയായിരുന്നു. ചൊവ്വാഴ്ച പുലര്ച്ചെ ക്ഷേത്രത്തില് വിളക്ക് വെക്കാനെത്തിയ ക്ഷേത്ര ഭാരവാഹിയാണ് ഓഫിസിന് സമീപത്ത് കിണറിനോട് ചേര്ന്ന് ഒരാള് കിടന്നുറങ്ങുന്നതായി കണ്ടത്. തുടര്ന്ന്, പോലീസിനെ അറിയിക്കുകയും, പൊലീസെത്തി ചോദ്യം യുവാവിനെ ചോദ്യം ചെയ്തശേഷം ക്ഷേത്രം പരിശോധിക്കുകയും ചെയ്തതോടെയാണ് മോഷ്ടാവാണെന്ന് തിരിച്ചറിഞ്ഞത്. ഇയാളില് നിന്ന് നാലായിരത്തിലേറെ രൂപയും പോലീസ് കണ്ടെടുത്തു. നാണയങ്ങള് ഒഴിവാക്കി ഭണ്ഡാരത്തിലെ നോട്ടുകള് മാത്രമാണ് എടുത്തതെന്ന് പ്രതി പോലീസിനോട് പറഞ്ഞു. സംഭവസമയം, പ്രതി മദ്യലഹരിയിലായിരുന്നു.അതേസമയം,മുതീരി പള്ളിയറക്കല് ദുര്ഗാഭഗവതി ക്ഷേത്രത്തിലെ ഭണ്ഡാരം പൊളിച്ച് എണ്പതിനായിരത്തോളം രൂപ കവര്ന്നതുമായി ഇയാള്ക്ക് ബന്ധമുണ്ടോയെന്ന് പൊലീസ് അന്വേഷിക്കുന്നുണ്ട്. കോടതിയില് ഹാജരാക്കി പ്രതിയെ റിമാന്ഡ് ചെയ്തു.