ഒടുവില് ജംഷീനക്ക് സഹായഹസ്തമെത്തി
ചങ്ങരംകുളം:സ്വാഗതമാട് പതിയില് മുഹമ്മദിന്റയും നജ്മുന്നീസയുടെയും മൂത്ത മകള് ജംഷീനയുടെ (22) ജീവിതാഭിലാഷം പൂവണിയുന്നു. സാമ്പത്തിക പ്രയാസം മൂലം പാലക്കാട് ചെബൈ സ്മാരക സംഗീത കോളജിലെ പഠനം വഴിമുട്ടിയ അന്ധവിദ്യാര്ഥിനിയുടെ തുടര്പഠന ചുമതല സംസ്കാര സാഹിതി ജില്ല കമ്മിറ്റി ഏറ്റെടുത്തു.നന്നായി പാടുന്ന, കീബോര്ഡും വയലിനും വായിക്കുന്ന ജംഷീനയുടെ ഇരു കണ്ണുകള്ക്കും കാഴ്ചയില്ല. ചെബൈ സ്മാരക സംഗീത കോളജില് ഒന്നാം വര്ഷ വിദ്യാര്ഥിനി ആയിരിക്കെയാണ് കോവിഡ് വില്ലനായെത്തിയത്. ഓണ്ലൈന് പഠനത്തിന് സാങ്കേതികതയുള്ള മൊബൈല് ഫോണ് നിര്ബന്ധമായി. കൂലിപ്പണിക്കാരനായ പിതാവിന്റ സാമ്പത്തിക സ്ഥിതി തിരിച്ചടിയായതോടെ സംഗീതപഠനം മുടങ്ങി.
പിന്നണി ഗായിക ആവുകയാണ് പെണ്കുട്ടിയുടെ സ്വപ്നമെന്നറിഞ്ഞ സംസ്കാര സാഹിതി ഭാരവാഹികള് കാരുണ്യഹസ്തം നീട്ടുകയായിരുന്നു. ജില്ല ചെയര്മാന് സമദ് മങ്കട, സംസ്ഥാന ജനറല് സെക്രട്ടറി പ്രണവം പ്രസാദ്, ഭാരവാഹികളായ ഡോ. കെ.എം.ജി. നമ്ബൂതിരി, ഷാജി കട്ടുപ്പാറ, അബൂബക്കര്, എ. മന്സൂര് അഹമ്മദ് എന്നിവര് വീട്ടിലെത്തി മൊബൈല് ഫോണ് നല്കി. മഞ്ചേരിയിലെ മന്സ ഇന്സ്റ്റിറ്റ്യൂട്ട് ഓഫ് മ്യൂസിക് സൗജന്യമായി വയലിന് അഭ്യസിപ്പിക്കും. തുടര്പഠനത്തിന് ആവശ്യമായതെല്ലാം നല്കുമെന്ന് സംസ്കാര സാഹിതി ഭാരവാഹികള് പറഞ്ഞു.