വിഡിയോ കോണ്ഫറന്സിങ് ലിങ്ക് ഇനി വാട്സ്ആപ്പിലൂടെ അയക്കില്ലെന്ന് സുപ്രീം കോടതി; കാരണമുണ്ട്..!
വാദം കേള്ക്കലുകള്ക്കായുള്ള വിഡിയോ കോണ്ഫറന്സിങ് ലിങ്കുകള് ഇനിമുതല് വാട്സ്ആപ്പ് ഗ്രൂപ്പുകള് മുഖേന അയക്കില്ലെന്ന തീരുമാനവുമായി സുപ്രീം കോടതി. മാര്ച്ച് ഒന്ന് മുതലായിരിക്കും ഇത് നടപ്പിലാക്കുകയെന്ന് കോടതി അറിയിച്ചു. സോഷ്യല് മീഡിയ ആപ്ലിക്കേഷനുകളെയും ഒടിടി പ്ലാറ്റ്ഫോമുകളെയും ഉദ്ദേശിച്ച് കേന്ദ്ര സര്ക്കാര് പുറപ്പെടുവിച്ച പുതിയ മാര്ഗ്ഗനിര്ദ്ദേശങ്ങളും ചട്ടങ്ങളുമാണ് പുതിയ തീരുമാനത്തിന് പിന്നിലെന്ന് സുപ്രീം കോടതി പുറപ്പെടുവിച്ച സര്ക്കുലറില് പറയുന്നു. ഇനിമുതല് ലിങ്കുകള് ബന്ധപ്പെട്ട ആളുകള്ക്കും അഭിഭാഷകര്ക്ക് അവരുടെ മൊബൈല് നമ്ബറുകളിലേക്ക് എസ്.എം.എസ് വഴിയോ, ഇ-മെയില് ആയോ അയച്ചു നല്കാനും തീരുമാനിച്ചിട്ടുണ്ട്.
വ്യാഴാഴ്ചയായിരുന്നു സര്ക്കാര് സോഷ്യല് മീഡിയ സ്ഥാപനങ്ങള്ക്കും ഒടിടി സേവനങ്ങള്ക്കുമായി പുതിയ മാര്ഗ നിര്ദേശങ്ങള് പുറപ്പെടുവിച്ചത്. സോഷ്യല് മീഡിയ പ്ലാറ്റ്ഫോമുകളിലെ സന്ദേശങ്ങളുടെ ഉറവിടം വെളിപ്പെടുത്താന് അതിെന്റ നടത്തിപ്പുകാരായ സ്ഥാപനങ്ങളെ നിയമപരമായി ബാധ്യസ്ഥരാക്കുന്നതടക്കം നിരവധി വിവാദ വ്യവസ്ഥകള് ഉള്ക്കൊള്ളുന്ന ചട്ടങ്ങളാണ് സര്ക്കാര് പുറത്തിറക്കിയത്. ഫേസ്ബുക്ക്, വാട്സാപ്, ട്വിറ്റര് പോലുള്ള സമൂഹ മാധ്യമങ്ങള്, ഓണ്ലൈന് വാര്ത്ത മാധ്യമങ്ങള്, നെറ്റ്ഫ്ലിക്സ്, ആമസോണ് പ്രൈം തുടങ്ങിയ ഒ.ടി.ടി (ഓവര് ദി ടോപ്) പ്ലാറ്റ്ഫോമുകള് എന്നിവക്കെല്ലാം പുതിയ നിയന്ത്രണങ്ങള് ബാധകമാണ്.