ചൈനയില്‍ ഐസ്ക്രീമില്‍ കോവിഡ് സാന്നിധ്യം; ആയിരക്കണക്കിന് പായ്ക്കറ്റുകള്‍ പിടിച്ചെടുത്തു
കോവിഡ് പ്രഭവ കേന്ദ്രമായ ചൈനയില്‍ നിന്ന് വീണ്ടും ഞെട്ടിക്കുന്ന വാര്‍ത്ത. ഐസ്ക്രീമില്‍ കോവിഡ് വൈറസ് സാന്നിധ്യം റിപ്പോര്‍ട്ട് ചെയ്തതായാണ് വിവരം. ഇതേ തുടര്‍ന്ന് ആയിരക്കണക്കിന് ഐസ്ക്രീം പായ്ക്കറ്റുകള്‍ അധികൃതര്‍ പിടിച്ചെടുത്തു.
വടക്കന്‍ ടിയാന്‍ജിന്‍ മുന്‍സിപ്പാലിറ്റിയിലാണ് സംഭവം. ടിയാന്‍ജിന്‍ ഡാകിയോഡാവോ ഫുഡ് കമ്ബനി നിര്‍മിച്ച ഐസ്‌ക്രീമുകളുടെ ബാച്ചുകളിലാണ് വൈറസ് സാന്നിധ്യം കണ്ടെത്തിയതെന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.
സംഭവത്തെ തുടര്‍ന്ന് 2,089 ഐസ്ക്രീം ബോക്സുകള്‍ നശിപ്പിച്ചു. 4,836 ബോക്സുകളില്‍ കോവിഡ് സാന്നിധ്യം കണ്ടെത്തിയതായും കമ്ബനി അധികൃതര്‍ അറിയിച്ചു. ഐസ്ക്രീം വാങ്ങിയ ഉപഭോക്താക്കളെ കണ്ടെത്താന്‍ ആരോഗ്യവകുപ്പ് ശ്രമങ്ങള്‍ തുടങ്ങുകയും ചെയ്തു.
അതേസമയം, ഫുഡ് കമ്ബനിയിലെ 1,600 ജീവനക്കാരെ നിരീക്ഷണത്തിലാക്കിയിരിക്കുകയാണ്. ഇവരില്‍ 700 ജീവനക്കാരുടെ പരിശോധനാ ഫലങ്ങള്‍ നെഗറ്റീവായിട്ടുണ്ട്. രോഗം ബാധിച്ച ഒരാളില്‍ നിന്നാകാം എസ്ക്രീമില്‍ വൈറസ് സാന്നിധ്യം എത്തിയതെന്നാണ് അധികൃതര്‍ നല്‍കുന്ന വിശദീകരണം.
