നിയന്ത്രണംവിട്ട പാല് ലോറി മറിഞ്ഞു; 20,000 ലിറ്റര് പാല്, തൈര് പാക്കറ്റുകള് റോഡില്
മൂവാറ്റുപുഴ: തമിഴ്നാട്ടില്നിന്ന് പാല് കയറ്റിവന്ന ലോറി നിയന്ത്രണം വിട്ട് വൈദ്യുതി പോസ്റ്റിലിടിച്ച് മറിഞ്ഞ് ഡ്രൈവറടക്കം മൂന്നുപേര്ക്ക് പരിക്ക്. സമീപത്തെ വൈദ്യുതി പോസ്റ്റും സ്വകാര്യ ഹോട്ടലിെന്റ മതിലും തകര്ത്ത ശേഷമാണ് ലോറി മറിഞ്ഞത്. മൂവാറ്റുപുഴ-കൂത്താട്ടുകുളം എം.സി റോഡില് 130 കവലക്ക് സമീപത്തെ വളവില് ബുധനാഴ്ച രാത്രി 12ഒാടെയായിരുന്നു അപകടം.
തമിഴ്നാട്ടില്നിന്ന് പാല് പാക്കറ്റുകള് ശീതീകരണ സംവിധാനമുള്ള ലോറിയില് പത്തനംതിട്ട, കൊല്ലം, തിരുവനന്തപുരം മേഖലകളില് വിതരണത്തിനായി കൊണ്ടുപോകുകയായിരുന്നു. എം.സി റോഡില് കബനി പാലസ് ഹോട്ടലിനു മുന്നിലെ വളവില് നിയന്ത്രണംവിട്ട ലോറി വൈദ്യുതി പോസ്റ്റില് ഇടിച്ചു. പോസ്റ്റ് ഒടിഞ്ഞ് വൈദ്യുതി ലൈനുകള് പൊട്ടിവീണു. ലോറി മറിയുകയും ചെയ്തു. ശീതീകരണ കാബിന് പൊട്ടി റോഡില് വീണതോടെ 20,000 ലിറ്റര് പാല്, തൈര് പാക്കറ്റുകള് തെറിച്ചുവീണു.
പരിക്കേറ്റവരെ സ്ഥലത്തെത്തിയ അഗ്നിരക്ഷാസേനയും പൊലീസും ചേര്ന്ന് ജനറല് ആശുപത്രിയിലെത്തിച്ച് പ്രാഥമിക ചികിത്സ നല്കി. ആറന്മുള സ്വദേശിയായ അജിയുടെ ഉടമസ്ഥയിലുള്ളതാണ് വാനും പാലും. റോഡില് വീണ പാല് പാക്കറ്റുകള് പലതും പൊട്ടിയിരുന്നു. നേരം പുലര്ന്നതോടെ വഴിപോക്കരും പ്രദേശവാസികളും പൊട്ടാതെ കിടന്ന പാലും തൈര് പാക്കറ്റുകളും എടുത്തുകൊണ്ടുപോയി. അപകടത്തെ തുടര്ന്ന് എം.സി റോഡില് മണിക്കൂറുകളോളം ഗതാഗതം സ്തംഭിച്ചു.