‘കേരളത്തിൽ ശത്രുക്കൾ, ത്രിപുരയിൽ ഒന്നിച്ചു, എന്നിട്ടും തകർന്നടിഞ്ഞു: അമിത് ഷാ
തൃശൂരിലെ ജനശക്തി റാലിയിൽ പങ്കെടുക്കാനെത്തി അമിത് ഷാ. 2024 ലോക്‌സഭാ തെരഞ്ഞെടുപ്പ് പ്രചരണത്തിന്റെ തുടക്കമാണ് ജനശക്തി റാലിയെന്ന് അമിത്ഷാ പറഞ്ഞു. കമ്മ്യൂണിസം ലോകം തന്നെ നിരാകരിച്ച ആശയമാണെന്നും കോൺഗ്രസിനെ രാജ്യവും പുറംതള്ളിയെന്നും അമിത് ഷാ റാലിക്കിടെ പറഞ്ഞു. കേരളത്തിൽ കോൺഗ്രസും കമ്മ്യൂണിസ്റ്റും ബദ്ധവൈരികളാണെങ്കിൽ ത്രിപുരയിൽ പക്ഷേ ഒറ്റക്കെട്ടാണെന്ന് അമിത് ഷാ പരിഹസിച്ചു. നിലനിൽപിനായി ആദർശം വരെ ബലികഴിച്ചാണ് അവർ ത്രിപുരയിൽ ഒന്നിച്ചതെന്നും എന്നിട്ടും തകർന്നടിഞ്ഞുവെന്നും അമിത് ഷാ ചൂണ്ടിക്കാട്ടി.
ജാഥയിൽ മോദി ഭരണകാലത്തെ വികസന നേട്ടങ്ങൾ അമിത്ഷാ എണ്ണി പറഞ്ഞു. രാജ്യത്തെ സമ്പദ്വ്യവസ്ഥ ലോകത്ത് അഞ്ചാം സ്ഥാനത്തെത്തിയെന്ന് അമിത് ഷാ പറഞ്ഞു. തൊഴിലുറപ്പ് പദ്ധതി വിഹിതം ഏറ്റവുമധികം ലഭിച്ച സംസ്ഥാനം കേരളമാണെന്നും അമിത് ഷാ ചൂണ്ടിക്കാട്ടി. പിഎഫ്‌ഐ നിരോധനം നേട്ടമായി അമിത്ഷാ ഉയർത്തിക്കാട്ടി.
