29 March 2024 Friday

തൃശൂരിൽ തെരുവുനായ ഓട്ടോറിക്ഷയ്ക്കു കുറുകെ ചാടി ഓട്ടോ നിയന്ത്രണം വിട്ടു മറിഞ്ഞ് ഡ്രൈവർ മരിച്ചു

ckmnews

പട്ടിക്കാട് (തൃശൂർ) മുടിക്കോട് സെന്ററിൽ തെരുവുനായ ഓട്ടോറിക്ഷയ്ക്കു കുറുകെ ചാടി ഡ്രൈവർ പൂവഞ്ചിറ പുത്തൻപുരയ്ക്കൽ ശ്രീധരന്റെ മകൻ സന്തോഷ് (46) മരിച്ചു. 


 ബുധൻ രാത്രി 07:00-നു പാലക്കാട് ഭാഗത്തേക്കുള്ള പാതയിലൂടെ വരികയായിരുന്ന ഓട്ടോയ്ക്കു മുന്നിലേക്കു ബസ് സ്റ്റോപ്പിനു സമീപം നിന്നിരുന്ന തെരുവുനായ ചാടുകയായിരുന്നു.നിയന്ത്രണം വിട്ട ഓട്ടോ മറിഞ്ഞു സാരമായ പരുക്കുകളോടെ സന്തോഷിനെ തൃശൂരിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല.തലയ്ക്കും ആന്തരികാവയവങ്ങൾക്കും ഗുരുതരമായി പരുക്കേറ്റ അദ്ദേഹം തൃശൂരിലെ സ്വകാര്യ ആശുപത്രിയിൽ ചികിത്സയിലിരിക്കെ രാത്രി 9.30നു മരിച്ചു.സ്വന്തം ഓട്ടോയിൽ, നഗരത്തിലെ പ്രമുഖ മെഡിക്കൽ സ്ഥാപനത്തിലെ മരുന്നു വിതരണ ജോലി ചെയ്യുന്ന സന്തോഷ് ജോലി കഴിഞ്ഞു വീട്ടിലേക്കു മടങ്ങുമ്പോഴായിരുന്നു അപകടം. ഓട്ടോയുടെ അടിയിൽ കുടുങ്ങിയ സന്തോഷിനെ നാട്ടുകാർ വാഹനം ഉയർത്തിയാണു പുറത്തെടുത്തത്. അമ്മ: ജാനകി. ഭാര്യ: ഷിംജ. 

മക്കൾ: ആദിത്യ, ആദിദേവ്.