Kottayam
പ്രശസ്ത നിർമ്മാതാവ് ജോസഫ് എബ്രഹാം അന്തരിച്ചു
കോട്ടയം: പ്രശസ്ത നിർമ്മാതാവ് ജോസഫ് എബ്രഹാം അന്തരിച്ചു. എഴുപത്തിനാല് വയസായിരുന്നു. കോട്ടയം മൂലവട്ടം ഗസ്റ്റ് ഹൗസിന് സമീപമുള്ള പ്രക്കാട്ട് വസതിയിലായിരുന്നു താമസം. ഓളങ്ങൾ, യാത്ര, ഊമക്കുയിൽ, കൂടണയും കാറ്റ് എന്നീ സിനിമകൾ നിർമ്മിച്ചിട്ടുണ്ട്. ഏറെക്കാലമായി ചികിത്സയിലായിരുന്നു.
മമ്മൂട്ടി, ശോഭന എന്നിവർ പ്രധാന വേഷങ്ങളിൽ എത്തിയ ചിത്രമാണ് 1985-ൽ പുറത്തിറങ്ങിയ 'യാത്ര'. അടിയന്തരാവസ്ഥക്കാലത്ത് പോലീസും ജയിൽ അധികൃതരും നടത്തിയ മനുഷ്യാവകാശ ലംഘനങ്ങളുടെ പശ്ചാത്തലത്തിലുള്ള കഥയാണ് യാത്രയുടെ പ്രമേയം.
ബാലു മഹേന്ദ്ര സംവിധാനം ചെയ്ത് 1982-ൽ പുറത്തിറങ്ങിയ മലയാള ചിത്രമാണ് 'ഓളങ്ങൾ'. അമോൽ പലേക്കർ ആദ്യമായി മലയാളത്തിൽ വേഷമിട്ട 'ഓളങ്ങളി'ൽ പൂർണിമ ജയറാമായിരുന്നു നായിക. ഇളയരാജ സംഗീതം നിർവഹിച്ച സിനിമയിലെ പാട്ടുകളെല്ലാം ഹിറ്റായിരുന്നു.