ചാലിശ്ശേരി യാക്കോബായ സുറിയാനി പള്ളിയിൽ ഓശാന പെരുന്നാൾ ആഘോഷിച്ചു
ചങ്ങരംകുളം: ചാലിശ്ശേരി സെന്റ് പീറ്റേഴ്സ് ആന്റ് സെൻറ് പോൾസ് യാക്കോബായ സുറിയാനി പള്ളിയിൽ ഓശാന പെരുന്നാൾ ആഘോഷിച്ചു.ഞായറാഴ്ച രാവിലെ യാക്കോബായ സുറിയാനി ചാപ്പലിൽ പ്രഭാത പ്രാർത്ഥനയ്ക്ക് ശേഷം വികാരി ഫാ. ജെക്കബ് കക്കാട്ട് വിശുദ്ധ കുർബ്ബാന അർപ്പിച്ചു.കുർബ്ബാനയുടെ മധ്യഭാഗത്തായി ഓശാന ശൂശ്രൂഷകൾ ആരംഭിച്ചു.യേശുക്രിസ്തു ജെറുസലേം ദേവലായത്തിലേക്ക് രാജകീയമായി പ്രവേശിച്ചതിന്റെ സ്മരണ പുതുക്കി
ഓശാന പെരുന്നാൾ പ്രദക്ഷിണം നടത്തി.പൊൻ - വെള്ളി കുരിശുകളുടെ അകമ്പടിയോടെ കുരുത്തോലകളേന്തിയും , പൂക്കൾ വിതറിയും വിശ്വാസികളും മദ്ബഹ ശൂ ശ്രുഷകരും വൈദീകനും പ്രദക്ഷിണത്തിൽ പങ്കെടുത്തു. തുടർന്ന് കുരുത്തോല വാഴ് വിന്റെ പ്രാർത്ഥന നടത്തി. പഴമ വായന , ശ്ളീഹാ വായന നടത്തി.ഏവൻഗേലിയോൻ വായനയിൽ ഓശാന കർത്താവിന്റെ നാമത്തിൽ വരുന്നവൻ വാഴ്ത്തപ്പെട്ടവനാകുന്നു ഉയരങ്ങളിൽ ഓശാന എന്നുള്ള പ്രതിവാക്യം വിശ്വാസികൾ ഏറ്റുചൊല്ലി.മദ്ബഹായിലെ നാലു ഭാഗത്തേക്കും വാഴ്ത്തിയ കുരുത്തോലകൾ ഉയർത്തി സ്ളീബ ആഘോഷം നടത്തി.വാഴ്ത്തിയ കുരുത്തോലകൾ വികാരി ഫാ. ജെക്കബ് കക്കാട്ട് വിശ്വാസികൾക്ക് നൽകി.കുർബ്ബാനക്കു ശേഷം, ആശീർവാദവും ,ഓശാന സന്ദേശവും , സ്ളീബ വണക്കവും നേർച്ച കഞ്ഞിയും ഉണ്ടായി.ഓശാന പെരുന്നാളിന് വികാരി ഫാ. ജെക്കബ് കക്കാട്ട് , ട്രസ്റ്റി സി യു ശലമോൻ സെക്രട്ടറി പി സി താരുകുട്ടി എന്നിവരടങ്ങുന്ന മാനേജിങ് കമ്മിറ്റി നേതൃത്വം നൽകി
