28 March 2024 Thursday

ലോകത്തിലെ ഏറ്റവും വലിയ വെര്‍ച്വല്‍ ഹോസ്പിറ്റല്‍ ശൃംഖലയുമായി സൗദി

ckmnews

ലോകത്തിലെ ഏറ്റവും വലിയ വെര്‍ച്വല്‍ ഹോസ്പിറ്റല്‍ ശൃംഖലയുമായി സൗദി


റിയാദ്: ലോകത്തിലെ ഏറ്റവും വലുതും മിഡിലീസ്റ്റിലെ ആദ്യത്തെയും വെര്‍ച്വല്‍ ഹോസ്പിറ്റല്‍ സൗദിയില്‍ പ്രവര്‍ത്തനം തുടങ്ങി. സിഹ വെര്‍ച്വല്‍ ഹോസ്പിറ്റല്‍ എന്ന പേരിലുള്ള ആശുപത്രി സൗദി ആരോഗ്യമന്ത്രി ഫഹദ് അല്‍ ജലാജെല്‍, കമ്മ്യൂണിക്കേഷന്‍സ് ആന്‍ഡ് ഇന്‍ഫര്‍മേഷന്‍ ടെക്‌നോളജി മന്ത്രി എന്‍ജിനീയര്‍ അബ്ദുല്ല അല്‍ സവാഹ എന്നിവര്‍ ചേര്‍ന്ന് ഇന്നലെ തിങ്കാളാഴ്ച രാജ്യത്തിന് സമര്‍പ്പിച്ചു. ഡിജിറ്റല്‍ ഗവണ്‍മെന്റ് ജനറല്‍ അതോറിറ്റി ഗവര്‍ണര്‍ എന്‍ജിനീയര്‍ അഹമ്മദ് അല്‍ സുവയാനും ചടങ്ങില്‍ സന്നിഹിതനായിരുന്നു.


അത്യാധുനിക സാങ്കേതിക വിജ്യയുടെ സഹായത്തോടെ രാജ്യത്തെ എല്ലാ മുക്കുമൂലകളിലും അതിവേഗത്തില്‍ മികച്ച മെഡിക്കല്‍ സേവനം ലഭ്യമാക്കുകയെന്ന ലക്ഷ്യത്തോടെയാണ് വെര്‍ച്വല്‍ ഹോസ്പിറ്റല്‍ സ്ഥാപിച്ചിരിക്കുന്നത്. നൂറ്റിയന്‍പതോളം ആശുപത്രികള്‍ ഓണ്‍ലൈന്‍ ശൃംഖലയില്‍ രജിസ്റ്റര്‍ ചെയ്തിട്ടുണ്ട്. സൗദി കിരീടാവകാശി മുഹമ്മദ് ബിന്‍ സല്‍മാന്റെ നേതൃത്വത്തില്‍ നടപ്പിലാക്കിവരുന്ന വിഷന്‍ 2030 പദ്ധതികളുടെ ഭാഗമായി ആരോഗ്യ മേഖലയിലെ ഡിജിറ്റല്‍വത്കരണത്തില്‍ വലിയ പ്രാധാന്യമാണ് സൗദി ഭരണകൂടം നല്‍കുന്നതെന്ന് ആരോഗ്യ മന്ത്രി പറഞ്ഞു. വെര്‍ച്വല്‍ മെഡിസിന്‍ ആപ്ലിക്കേഷനുകള്‍ വര്‍ദ്ധിപ്പിക്കുക, പൗരന്മാരുടെ സേവനത്തില്‍ മികച്ച വെര്‍ച്വല്‍ ആരോഗ്യ സേവനങ്ങള്‍ നല്‍കുക എന്നിവയാണ് സിഹയുടെ ലക്ഷ്യം. പ്രതിവര്‍ഷം 500,000 ഗുണഭോക്താക്കള്‍ക്ക് അതുവഴി സേവനങ്ങള്‍ എത്തിക്കാനാവുമെന്നാണ് അധികൃതരുടെ കണക്കുകൂട്ടല്‍. ഏറ്റവും പുതിയ വെര്‍ച്വല്‍ ഹെല്‍ത്ത്‌കെയര്‍ ടെക്‌നോളജി ഉപയോഗപ്പെടുത്തിയാണ് സംവിധാനം പ്രവര്‍ത്തിക്കുക.


അത്യാവശ്യ ഘട്ടങ്ങളില്‍ നേരിട്ട് ആശുപത്രികളിലേക്ക് പോകുന്നതിന് പകരം ഓണ്‍ലൈന്‍ വഴി രോഗിക്ക് ഡോക്ടര്‍മാരെ ബന്ധപ്പെടാം. രോഗിയുടെ പ്രദേശത്തെ ആരോഗ്യ കേന്ദ്രമോ ആശുപത്രിയോ അടിയന്തിരമായി രോഗിയുമായി ബന്ധപ്പെടും. ആവശ്യമെങ്കില്‍ വീടുകളില്‍ തന്നെ ഐസിയു സേവനങ്ങള്‍ ലഭ്യമാക്കുകയും ഓണ്‍ലൈനില്‍ നിരീക്ഷണ സംവിധാനങ്ങള്‍ ഏര്‍പ്പെടുത്തുകയും ചെയ്യും. രാജ്യത്തെ ആശുപത്രികള്‍ തമ്മിലും ഡോക്ടര്‍മാര്‍ തമ്മിലും വൈദഗ്ധ്യ കൈമാറ്റത്തിനുള്ള സംവിധാനവും വെര്‍ച്വല്‍ ആശുപത്രി വഴി ഒരുക്കാനാവും. രാജ്യത്തെ മികച്ച ആശുപത്രികളില്‍ നിന്നുള്ള വിദഗ്ധ ഡോക്ടര്‍മാരുടെ സേവനങ്ങള്‍ രാജ്യത്തിന്റെ എല്ലാ ഭാഗങ്ങളിലും ഉള്ളവര്‍ക്ക് ലഭ്യമാക്കാന്‍ ഇതുവഴി കഴിയും. വിദൂര ദിക്കുകളിലുള്ളവര്‍ക്കും തിരക്കേറിയ ഇടങ്ങളിലും പുതിയ സംവിധാനം വലിയ നേട്ടമാകുമെന്ന് ആരോഗ്യ വകുപ്പ് ഉപ മന്ത്രിയും ഔദ്യോഗിക വക്താവുമായ ഡോ. മുഹമ്മദ് അല്‍ അബ്ദുല്‍ ആലി പറഞ്ഞു