സന്തോഷ് ട്രോഫി ; മലപ്പുറം ഒരുങ്ങുന്നു
മലപ്പുറം ജില്ല ആദ്യമായി സന്തോഷ് ട്രോഫി ഫൈനല്‍ റൗണ്ട് മത്സരങ്ങള്‍ക്ക് വേദിയാകാന്‍പോവുന്നു.മഞ്ചേരി പയ്യനാട് സ്റ്റേഡിയത്തിലാ‍യിരിക്കും മത്സരം. കാലിക്കറ്റ് സര്‍വകലാശാല, കോട്ടപ്പടി, തിരൂര്‍, എടപ്പാള്‍, എടവണ്ണ, മഞ്ചേരി ഗവ. ബോയ്സ് ഹയര് സെക്കന്‍ഡറി സ്കൂള്‍ എന്നിവിടങ്ങളിലെ സ്േറ്റഡിയങ്ങള്‍ പരിശീലനത്തിനും പരിഗണിക്കുന്നു. സന്തോഷ് ട്രോഫി മത്സരങ്ങളും പരിശീലനവും നടക്കാനിരിക്കുന്ന മൈതാനങ്ങളിലൂടെ.
പയ്യനാട് സ്റ്റേഡിയം
സന്തോഷ് ട്രോഫി ഫൈനല്‍ റൗണ്ട് മത്സരങ്ങള്‍ക്ക് മുന്നോടിയായി പയ്യനാട് സ്റ്റേഡിയത്തില്‍ സൗകര്യങ്ങള്‍ വര്‍ധിപ്പിക്കുന്ന പ്രവൃത്തി ഉടന്‍ ആരംഭിക്കും. ഗാലറിയില്‍ കാഴ്ചക്ക് അസൗകര്യം നേരിടുന്ന ചില ഭാഗങ്ങള്‍ ഉയര്‍ത്താനും സൗകര്യങ്ങള്‍ കൂട്ടാനുമുള്ള പ്രവൃത്തികളാണ് നടക്കുക. ഇതിന് പുറമെ പവലിയന് താഴെ സ്ഥാപിക്കാന്‍ 1000 പുതിയ കസേരകള്‍ വാങ്ങും. ഗാലറിക്ക് താഴെയുള്ള പഴയ കസേരകള്‍ അറ്റകുറ്റപ്പണി നടത്തും. സ്റ്റേഡിയത്തിലേക്കുള്ള മുഴുവന്‍ റോഡുകളും ഗതാഗതയോഗ്യമാക്കാനും പദ്ധതിയുണ്ട്. നിലവില്‍ 1200 വെര്‍ട്ടിക്കല്‍ ലക്സ് പ്രകാശതീവ്രതയുള്ള വിളക്കുകളാണ് സ്ഥാപിച്ചത്. ഇത് വര്‍ധിപ്പിക്കാനും ആലോചനയുണ്ട്. നാല് കോടി രൂപ ചെലവിലാണ് ഫ്ലഡ്ലൈറ്റ് സ്ഥാപിച്ചത്.
കാലിക്കറ്റ് സര്‍വകലാശാല സ്റ്റേഡിയം
ദേശീയ അന്തര്‍ സര്‍വകലാശാല ഫുട്ബാള്‍, ദക്ഷിണേന്ത്യ അന്തര്‍ സര്‍വകലാശാല ഫുട്ബാള്‍ തുടങ്ങിയവക്ക് വേദിയായ കാലിക്കറ്റ് സര്‍വകലാശാല സ്റ്റേഡിയം സന്തോഷ് ട്രോഫി മത്സരങ്ങള്‍ നടത്താന്‍ പര്യാപ്തമാണ്. ഗാലറി, ഡ്രസ്സിങ് റൂം, ശുചിമുറി തുടങ്ങിയവയെല്ലാമുണ്ട്. ജില്ലയിലെ മറ്റ് സ്റ്റേഡിയങ്ങള്‍ പരിശോധിച്ച്‌ മടങ്ങവെയാണ് അഖിലേന്ത്യ ഫുട്ബാള്‍ ഫെഡറേഷന്‍ പ്രതിനിധികള്‍ സര്‍വകലാശാല മൈതാനം സന്ദര്‍ശിച്ചത്. സൗകര്യങ്ങളുടെ കാര്യത്തില്‍ സംതൃപ്തി രേഖപ്പെടുത്തിയതായാണ് വിവരം.കാലിക്കറ്റ് സര്‍വകലാശാല ഫുട്ബാള്‍ സ്റ്റേഡിയം
കോട്ടപ്പടി ഫുട്ബാള്‍ സ്റ്റേഡിയം
ജില്ല ആസ്ഥാനത്തെ കോട്ടപ്പടി ഫുട്ബാള്‍ സ്റ്റേഡിയത്തില്‍ നവീകരണപ്രവൃത്തികള്‍ നടക്കുന്നുണ്ട്. ഗാലറിയിലെ ഇരിപ്പിടത്തില്‍ മാറ്റ് വിരിച്ചു. സ്ഥിരം കസേരകള്‍ സ്ഥാപിക്കാനും പദ്ധതിയുണ്ട്. സന്തോഷ് ട്രോഫി പരിശീലനത്തിന് നല്‍കേണ്ടി വരുമെന്ന് ഉറപ്പായതോടെ ടര്‍ഫിലെ വിടവുകള്‍ നികത്തല്‍, കുഴികള്‍ അടക്കല്‍ തുടങ്ങിയവ താമസിയാതെ തുടങ്ങും. മഴ മാറാന്‍ കാത്തിരിക്കുകയാണ് അധികൃതര്‍.
എടവണ്ണ സീതി ഹാജി സ്റ്റേഡിയം
പയ്യനാട് സ്റ്റേഡിയം സന്തോഷ് ട്രോഫി മത്സരത്തിന് വേദിയാകാന്‍ ഒരുങ്ങുമ്ബോള്‍ മത്സരത്തിനെത്തുന്ന ടീമുകള്‍ക്ക് പരിശീലനത്തിനായി ഒരുങ്ങുകയാണ് എടവണ്ണ സീതി ഹാജി സ്റ്റേഡിയം. 100 മീറ്റര്‍ നീളത്തിലും 70 മീറ്റര്‍ വീതിയിലുമുള്ള ജില്ലയിലെ നാല് ഇലവന്‍സ് മൈതാനങ്ങളില്‍ പ്രധാനപ്പെട്ടതാണിത്. പരിമിതിക്കുള്ളില്‍ ആധുനിക സൗകര്യങ്ങളോടെ സന്തോഷ് ട്രോഫി താരങ്ങള്‍ക്ക് പരിശീലനം നടത്താന്‍ സജ്ജമാണ്. നിരവധി തവണ സംസ്ഥാന, ജില്ല, അഖിലേന്ത്യ ഫുട്ബാള്‍ മത്സരങ്ങള്‍ക്കും സ്റ്റേഡിയം വേദിയായിട്ടുണ്ട്. അറ്റകുറ്റപ്പണികള്‍ പുരോഗമിക്കുകയാണ്.
മഞ്ചേരി ബോയ്സ് സ്കൂള്‍ മൈതാനം
പയ്യനാട് സ്റ്റേഡിയത്തില്‍ സന്തോഷ് ട്രോഫി മത്സരങ്ങള്‍ നടക്കുമ്ബോള്‍ ടീമുകള്‍ക്ക് പരിശീലനം നടത്താനുള്ള മൈതാന പട്ടികയില്‍ മുന്‍പന്തിയിലാണ് മഞ്ചേരി ഗവ. ബോയ്സ് ഹയര് സെക്കന്‍ഡറി സ്കൂള്‍ മൈതാനം. സ്റ്റേഡിയത്തിലേക്ക് ഇവിടെ നിന്ന് അധികദൂരമില്ലെന്നത് സാധ്യത വര്‍ധിപ്പിക്കുന്നു. എന്നാല്‍, അസൗകര്യങ്ങള്‍ക്ക് നടുവിലാണ് ഇവിടം. കളിക്കാര്‍ക്ക് വിശ്രമിക്കാനും വസ്ത്രം മാറാനും മതിയായ സൗകര്യങ്ങള്‍ ഇല്ല. ശുചിമുറികളുടെ അഭാവവുമുണ്ട്. കോവിഡ് പ്രതിസന്ധിയില്‍ മൈതാനം വേണ്ടത്ര ഉപയോഗിക്കാതിരുന്നതോടെ പല ഭാഗത്തും പുല്ലും മുളച്ചു. പരിശീലനത്തിന് ഉപയോഗിക്കണമെങ്കില്‍ താല്‍ക്കാലിക സംവിധാനങ്ങള്‍ ഒരുക്കേണ്ടി വരും.
എടപ്പാള്‍ സ്കൂള്‍ സ്റ്റേഡിയം
ഒക്ടോബര്‍ ആദ്യം അഖിലേന്ത്യ ഫുട്ബാള്‍ ഫെഡറേഷന്‍ പ്രതിനിധികള്‍ എടപ്പാള്‍ ഗവ. ഹയര് സെക്കന്‍ഡറി സ്കൂള്‍ സ്റ്റേഡിയം സന്ദര്‍ശിച്ച്‌ സ്ഥിതി വിലയിരുത്തിയിരുന്നു.എടപ്പാള്‍ ഗവ. ഹയര് സെക്കന്‍ഡറി സ്കൂള്‍ സ്റ്റേഡിയം
ഫ്ലഡ്ലിറ്റ്, നാച്വറല്‍ ടര്‍ഫ്, ഓട്ടോമാറ്റഡ് സ്പ്രിംഗ്ലര്‍ സിസ്റ്റത്തോട കൂടിയ ഫിഫ അംഗീകൃത ഇലവന്‍സ് ഫുഡ്ബാള്‍ കോര്‍ട്ട് എന്നിവക്ക് പുറമേ കളിക്കാര്‍ക്കുള്ള മുറികള്‍, മെഡിക്കല്‍ റൂം, ഫിസിക്കല്‍ എജുക്കേഷന്‍ റൂം, മീഡിയ റൂം, സ്റ്റോര്‍ റൂം, ശുചിമുറി സൗകര്യങ്ങളോടു കൂടിയ എമിനിറ്റി സെന്‍ററും ഇവിടെയുണ്ട്. ഫ്രെബുവരിയിലാണ് സ്റ്റേഡിയം നാടിന് സമര്‍പ്പിച്ചത്. എന്നാല്‍, ഇതുവരെ പന്തുരുണ്ടിട്ടില്ല. സന്തോഷ് ട്രോഫി മത്സരം തന്നെ എടപ്പാളിലേക്ക് ലഭിക്കുമെന്ന് സൂചനയുണ്ടായിരുന്നു. പരിശീലന മൈതാനമാവുമെന്ന് ഉറപ്പിച്ചിട്ടുണ്ട്.
തിരൂര്‍ രാജീവ് ഗാന്ധി മുനിസിപ്പല്‍ സ്റ്റേഡിയം
സന്തോഷ് ട്രോഫി മത്സരത്തിന് തിരൂര്‍ രാജീവ് ഗാന്ധി മുനിസിപ്പല്‍ സ്റ്റേഡിയം വേദിയാവുമോ ഇല്ലയോ എന്ന് ഇതുവരെ വ്യക്തമല്ല. പരിശീലന മൈതാനമായി പരിഗണിക്കുന്നുണ്ട്. അഖിലേന്ത്യ ഫുട്ബാള്‍ ഫെഡറേഷന്‍ പ്രതിനിധികള്‍ സ്റ്റേഡിയം സന്ദര്‍ശിച്ചിരുന്നു. ബാത്ത് റൂം, കളിക്കാര്‍ക്കുള്ള ഡ്രസ്സിങ് റൂം എന്നീ സൗകര്യങ്ങളില്ലാത്തതിനാലാണ് സന്തോഷ് ട്രോഫി മത്സരം തിരൂരില്‍ നടക്കുമോയെന്ന കാര്യത്തില്‍ എ.ഐ.എഫ്.എഫ് ഇതുവരെ ഉറപ്പ് നല്‍കാത്തത്. സൗകര്യം ഒരുക്കുന്നതിെന്‍റ പേരില്‍ തിരൂര്‍ നഗരസഭ ഭരണപക്ഷ, പ്രതിപക്ഷ പഴിചാരലിനും ഇടയാക്കിയിരുന്നു.ഉടന്‍ മതിയായ സൗകര്യമൊരുക്കുമെന്നാണ് തിരൂര്‍ നഗരസഭ ചെയര്‍പേഴ്സനും വൈസ് ചെയര്‍മാനും അറിയിച്ചത്.
