28 March 2024 Thursday

മലയാളി നഴ്‌സിങ് വിദ്യാർഥിനി മംഗളൂരുവിലെ ഹോസ്റ്റലിൽ ജീവനൊടുക്കിയ നിലയിൽ

ckmnews

മലയാളി നഴ്‌സിങ് വിദ്യാർഥിനി മംഗളൂരുവിലെ ഹോസ്റ്റലിൽ ജീവനൊടുക്കിയ നിലയിൽ


മംഗളൂരു ∙ മലയാളി നഴ്‌സിങ് വിദ്യാർഥിനി മംഗളൂരുവിലെ കോളജ് ഹോസ്റ്റലിൽ ആത്മഹത്യ ചെയ്തു. ചിറ്റാരിക്കൽ അരിമ്പയിലെ തൂമ്പുങ്കൽ ജാൻസിയുടെ മകൾ നിന സതീഷ് (19) ആണു മരിച്ചത്. 


ചൊവ്വാഴ്ച രാവിലെയാണു വിദ്യാർഥിനിയെ ഹോസ്റ്റൽ ശുചിമുറിയുടെ വെന്റിലേഷനിൽ തൂങ്ങിയ നിലയിൽ കണ്ടെത്തിയത്. മുറിയിൽ താമസിക്കുന്ന മറ്റു വിദ്യാർഥികളാണു കണ്ടത്. 


ഉടൻ സമീപത്തെ സ്വകാര്യ ആശുപത്രിയിൽ എത്തിച്ചു. ഇന്നലെ രാവിലെ മരിച്ചു. അമ്മ ജാൻസി ചെറുപുഴയിലെ കടയിൽ ജോലി ചെയ്താണു മകളെ പഠിപ്പിക്കുന്നതും കുടുംബം പുലർത്തുന്നതും. 


സാമ്പത്തിക പ്രയാസം കാരണം നിനയുടെ ഫീസ് അടയ്ക്കാൻ ബാക്കിയുണ്ടായിരുന്നു. ഫീസ് അടക്കാൻ കഴിയാത്തതിൽ ഉള്ള മനഃപ്രയാസമാണ് ജീവനൊടുക്കാൻ കാരണമെന്നാണു പൊലീസ് പറയുന്നത്. ഫീസ് വൈകിയതിനു കോളജ് അധികൃതരും അഡ്മിഷൻ ഏജന്റും മാനസികമായി പീഡിപ്പിച്ചതായി ആരോപണമുണ്ട്. 


ഫീസ് അടയ്ക്കാൻ സാവകാശം ചോദിച്ചെങ്കിലും അഡ്മിഷൻ ഏജന്റ് അനുവദിച്ചില്ലെന്ന് വിദ്യാർഥിനിയുടെ അമ്മ പറഞ്ഞു. അലീന, ആൽഫ്രഡ് എന്നിവർ സഹോദരങ്ങളാണ്. സംസ്കാരം ഇന്നു 10.30ന് ആയന്നൂർ സെന്റ് ജോർജ് പള്ളിയിൽ.