യുവാവ് തൂങ്ങി മരിച്ചതറിഞ്ഞ മനോവിഷമത്തില്‍ അതേമരത്തില്‍ തന്നെ അച്ചനും തൂങ്ങി മരിച്ചു.
കുന്നംകുളം: യുവാവ് തൂങ്ങി മരിച്ചതറിഞ്ഞ് മനോവിഷമത്തില്‍ അതേ മരത്തില്‍ തന്നെ അച്ചനും തൂങ്ങിമരിച്ചു. എയ്യാല്‍ ആദൂര്‍ റോഡില്‍ ജാഫര്‍ ക്ലബിന് സമീപമാണ് സംഭവം. കിഴക്കൂട്ട് രാമു എന്ന് വിളിക്കുന്ന ദാമോദരന്‍ (53), മകന്‍ ശരത് (27) എന്നിവരാണ് മരിച്ചത്. ഇന്നലെ രാത്രി വൈകിയും ശരത് വീട്ടില്‍ എത്താത്തതിനെ തുടര്‍ന്ന് സഹോദരന്‍ അന്വേഷിച്ചിറങ്ങിയപ്പോഴാണ് വീടിനടുത്ത് പാടത്തിനോടു ചേര്‍ന്ന മരത്തില്‍ തൂങ്ങി നില്‍ക്കുന്നത് കണ്ടത്. ഉടനെ വീട്ടില്‍ ഓടിയെത്തി ദാമോദരനെ വിവരമറിയിച്ചു. രണ്ടുപേരും ചേര്‍ന്ന് ശരത്തിനെ താഴെയിറക്കാന്‍ ശ്രമിക്കുകയും ചെയ്തു. താഴെയിറക്കുന്നതിനായി മരത്തില്‍ കയറിയ ദാമോദരന്‍ പെട്ടെന്ന് ഉടുത്തിരുന്ന മുണ്ട് മരത്തില്‍ കെട്ടി കഴുത്തില്‍ കുരുക്കി താഴേക്ക് ചാടുകയായിരുന്നു. ഒന്നും ചെയ്യാനാവാതെ രണ്ടു മരണം കണ്ട നടുക്കത്തിലായിരുന്നു ദാമോദരന്‍റെ രണ്ടാമത്തെ മകന്‍ സജിത്ത്. സംഭവമറിഞ്ഞ് ഓടിയെത്തിയ നാട്ടുകാര്‍ പോലീസില്‍ വിവരമറിയിച്ചു. ഇന്നു രാവിലെയാണ് മൃതദേഹം താഴെയിറക്കി ഇന്‍ക്വസ്റ്റ് നടപടികള്‍ ആരംഭിച്ചത്.
